Վերջին պաշտոնանկությունների շուրջ քաղաքական ձնագնդին դեռ պտտվում է՝ բացելով կամ բացահայտելով տեղի ունեցածի քաղաքական համատեքստը: Առայժմ ԱԱԾ նախկին պետ Արթուր Վանեցյանը փակ է պահում իր քաղաքական հավակնության վարագույրը, չնայած դա երկար շարունակվել չի կարող, որովհետև շղթայական ռեակցիան այսպիսի դեպքերում ավարտվում է՝ անկախ որևէ մեկի կամքից: Այս և այլ թեմաների շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Անուշ Բեղլոյանը, «Իրազեկ քաղաքացիների միավորում» ՀԿ ծրագրերի տնօրեն Դանիել Իոաննիսյանը և քաղաքագետ Արմեն Վարդանյանը:
Այսօր հրապարակվեց ՀՀ երկրորդ նախագահ Ռոբերտ Քոչարյանի պաշտպանի ներկայացրած գրավի միջնորդության վերաբերյալ որոշումը. դատարանը մերժեց Քոչարյանի պաշտպանի միջնորդությունը: Հարց է առաջանում. իսկ ե՞րբ է հերթը հասնելու բուն դատաքննությանը: Անդրադառնալով այս դիտարկմանը՝ Անուշ Բեղլոյանն ընդգծեց, որ դատարանի որոշումը օրինաչափ էր: «Ամբաստանյալի փաստաբաններն ամեն ինչ անում են, որպեսզի հետաձգվի գործի բուն քննությունը, քանի որ այդ պրոցեսն սկսվելուց հետո թեժ կերպով կփոխվի քաղաքական իրավիճակը, և այն աղմուկը և շահարկումները, որ կան քաղաքական դաշտում, իրենց տեղը կզիջեն շատ լուրջ բացահայտումներին: Հանրության առջև կբացահայտվեն այն բոլոր փաստերը, որոնց հիման վրա մեղադրվում է Ռ. Քոչարյանը, և քաղաքական գնահատականը կդառնա ավելի առարկայական»,- նշեց պատգամավորը:
Արմեն Վարդանյանը հավելեց, որ Ռ. Քոչարյանի պաշտպանների որդեգրած մարտավարությունը, որով ամեն կերպ փորձում են ձգձգել գործի քննությունը, տապալվելու է: «Եթե այդ գործը գնա դատարան, խայտառակ բացահայտումներ են լինելու: Քոչարյանի պաշտպանների փորձերը տապալվում են, կարծում եմ՝ մոտ ժամանակներում կսկսվի դատական գործընթացը»,- նշեց քաղաքագետը:
Դանիել Իոաննիսյանի դիտարկմամբ՝ ըստ էության, խոչընդոտներ չկան սկսելու բուն դատաքննությունը: Նրա խոսքով՝ Քոչարյանը չի կարող հակահեղափոխություն անել. «Դա իրենց ստեղծած իլյուզիան է»: Իոաննիսյանի կարծիքով՝ հակահեղափոխության ռիսկեր չեն կարող պարունակել նաև ուժային կառույցները. «Այդ կառույցները վարչապետի ենթակայության տակ են, և եթե նրանց քայլերը հակասեն վարչապետի մոտեցումներին, ապա ուժային կառույցի ղեկավարի փոփոխությունը մեկ ժամ էլ չի տևի»: Իոաննիսյան նաև հավելեց, որ վարչապետի վարկանիշը շատ բարձր է, նրան վստահում են և ուժային կառույցներից ոչ մեկի ղեկավարի մտքով անգամ չի անցնի հեղաշրջման փորձ անել:
Արմեն Վարդանյանը, անդրադառնալով ԱԱԾ նախկին տնօերն Ա. Վանեցյանի պաշտոնանկությանը՝ նշեց, որ հավանաբար Վանեցյանը բազմակի խաղերի մեջ է եղել, որը չի վրիպել վարչապետի աչքից: Քաղաքագետն առանձնացրեց ԱԱԾ նախկին պետի պաշտոնանկության համար հիմք հանդիսացած երեք հնարավոր վարկած. «Առաջին վարկածն այն է, որ նա ինֆորմացիա է տվել նախկին իշխանության ներկայացուցիչներին, այդ մասին Փաշինյանն ակնարկ արեց՝ կապված Միքայել Մինասյանի հետ: Երկրորդ հավանական տարբերակն այն է, որ Վանեցյանը սեփական քաղաքական խաղ է սկսել խաղալ, որը չի վրիպել վարչապետի աչքից, և նա արմատախիլ է արել այդ երևույթը: Եվ երրորդ՝ հնարավոր է, որ Վանեցյանը, նախկին իշխանությունների հետ համագործակցելով, տարբեր գործերի քննություններին ընթացք չի տվել, սառեցրած է պահել»:
Մանրամասն՝ տեսանյութում: