Վերջին օրերի պաշտոնանկությունները, ըստ Ձեզ, պարզ տեղաշա՞րժ է, թե՞ ավելին, և ի՞նչ է կատարվում իշխանության ներսում․ «Առաջին լրատվական»-ի հարցին Ազգային ժողովի պատգամավոր Արման Բաբաջանյանը պատասխանեց․ «Ես կարծում եմ, որ այն, ինչ տեղի է ունենում, շատ ավելին է, քան ներկայացվում է, որովհետև խորապես համոզված եմ, որ կանխվել է 2018 թվականին Հայաստանում սկիզբ դրված վերափոխումները ձախողելու դավադրական մի ծրագիր։ Հույս ունեմ, որ այս հեռացումները չի վերաբերի ուղղակի անձերի, այլ իսկապես համակարգային փոփոխությունների սկիզբ կդրվի, ինչի մասին, ի դեպ, վարչապետն իր գրառման մեջ էր ակնարկել, որ ԱԱԾ-ն ոչ թե անձինք են, այլ համակարգ է։ Ես հույս ունեմ, որ, առհասարակ, հեղափոխական թիմը պետք է փոխի իր մտածողությունը՝ անձերի վրա հիմնված, նրանց կամքին ենթարկվող մեր ամբողջ քաղաքական գործընթացները պետք է դնել ֆունդամենտալ, ինստիտուցիոնալ հիմքերի վրա։ Այստեղ չեմ կարող չհամաձայնել, որ իսկապես համակարգային լուծումների և բարեփոխումների անհրաժեշտություն կա և՛ Ազգային անվտանգության ծառայությունում, և՛ ոստիկանությունում։ Այստեղ նաև շատ կարևոր է, թե ով է դառնալու ԱԱԾ տնօրենը։ Դրանից կհասկանանք նաև այն ակնարկները, որոնք վարչապետն արել է իր վերջին գրառման մեջ։ Կհասկանանք նաև, թե արդյոք այստեղ արտաքին հետք կա՞, թե՞ ոչ»։
Իսկ Իրավաբանների հայկական ասոցիացիայի նախագահ Կարեն Զադոյանն ասաց․ «Ես կարծում եմ, որ առաջին հերթին կառավարությունը կամ վարչապետը պետք է հանրությանը ներկայացնեն, թե ինչ պատճառով են եղել այդ պաշտոնանկությունները, որովհետև վարչապետը հայտարարեց, որ դրանք եղել են փոխադարձ համաձայնությամբ, բայց դրան հետևեց Վանեցյանի հրաժարականի դիմումը, որը հակասական տպավորություններ է թողնում։ Կարծում եմ՝ նոր իրողություններում հանրությունն իրավունք ունի իմանալու, թե ինչ է կատարվում իշխանության ուժային կառույցներում, և որոնք են իրական պատճառները։ Մյուս հանգամանքն այն է, որ ես համաձայն եմ պարոն Բաբաջանյանի հետ՝ պետք է համակարգային լուծում լինի, ոչ թե անձերի հետ կապված»։
Մանրամասները՝ տեսանյութում։
