Նախկին քաղբանտարկյալ Վարդան Մալխասյանը ողջունում է ՀՀ նախկին զինդատախազ, նախկին քաղբանտարկյալ Գագիկ Ջհանգիրյանին Վճռաբեկ դատարանի կողմից արդարացնելը։
«Դա ազդակ էր, որ արդարությունը պետք է քայլ առ քայլ, փուլ առ փուլ վերականգնվի։ Ես իմ նախորդ ելույթներում էլ միշտ ասել եմ, որ մեր ժողովուրդը կարոտ է արդարության։ Եթե այդ խնդիրը մեր երկրում լուծվի, մյուս խնդիրներն ինքնին կլուծվեն։ Ինչքան անօրինականություններ, անարդարություններ են եղել, ամեն ինչ պետք է դուրս գա ջրի երես, պարզաբանվի»,- ասաց Վարդան Մալխասյանը։
Միաժամանակ, նախկին քաղբանտարկյալը նշեց, որ ինքն առայժմ չի դիմել, որպեսզի իրեն արդարացնեն։
«Եթե հարմար գտնեն, թող արդարացնեն, եթե ոչ, ապա ես չեմ դիմի։ Հիմա Քրեական օրենսգրքի այն հոդվածով, որով ազատազրկված է Ռոբերտ Քոչարյանը, այդ նույն հոդվածով, իր նախաձեռնությամբ, ինձ ազատազրկեցին։ Զավեշտ է։ Հետո պարզվեց, որ ինձ անհիմն մեղադրանք են առաջադրել, ես գրողների խոսքերից մեջբերումներ էի արել, ասենք՝ Միքայել Նալբանդյանի, Վահան Տերյանի խոսքերից, ինձ վերագրեցին, թե ես իշխանությունը տապալելու կոչեր եմ արել։ Անհեթեթ բան։ Չի կարող լինել արդարադատություն, օրենք ու իրավունք, եթե չկան դրանց հետևում կանգնած մարդիկ։ Հիմա նոր իշխանություններին դեռ չի հաջողվել ազատվել հին համակարգի մնացորդներից։ Բայց իրենք գնում են այդ ճանապարհով, և դա ուրախացնող է։ Պետք է քայլ առ քայլ գնանք այն ճանապարհով, որ այս երկիրը դարձնենք օրինաց երկիր (այդպիսի մի կուսակցություն ունեինք, չէ՞)»,- մեզ հետ զրույցում ասաց Վարդան Մալխասյանը, որն ազատազրկվել էր 2006-2008թթ․։