Ժամանակին, երբ ներքաղաքական կյանքը մի քիչ վայրիվերումների մեջ էր ընկնում, ասում էինք՝ տնտեսությանը հարվածներ է հասցվելու, և հակառակը։ Հիմա չկան այդ մոտեցումները։ Ինչ-որ բա՞ն է փոխվել․ «Առաջին լրատվական»-ի հարցին Հայաստանի գործատուների հանրապետական միության նախագահ Գագիկ Մակարյանը պատասխանեց․ «Կարծում եմ, որ պահանջները նույնն են մնում։ Ուղղակի հիմա հոգեբանական վիճակն է մի փոքր տարբեր։ Բայց, այնուամենայնիվ, տնտեսությունն իսկապես կարևոր է, և բոլոր պաշտոնյաները, բոլոր ոլորտները, կառավարության բոլոր թևերն ուղղակի կամ անուղղակի ձևով մասնակցում են այդ գործառույթներին։ Նրանք պետք է ապահովեն որոշակի թափանցիկություն, համերաշխության մթնոլորտ, կայունության մթնոլորտ, կանխատեսելի, վստահության մթնոլորտ, և աջակցեն, խթանեն այն գործընթացներին, որոնք ուղղված են տնտեսության զարգացմանը»։
Այժմ ՀՆԱ-ն աճում է, ի՞նչ եք կարծում, դա կայո՞ւն դինամիկա է, թե՞ կան ժամանակավոր խթանիչներ, որոնք թույլ են տալիս այդ թվերն ունենալ․ «Առաջին լրատվական»-ի հարցին Գագիկ Մակարյանը պատասխանեց․ «Ինձ թվում է, որ ՀՆԱ-ի աճը գնում է երկու-երեք պատճառներով։ Առաջինը, որ տնտեսության ներքին խոչընդոտող հանգամանքները վերացել կամ թուլացել են, այսինքն՝ պետությունն ունի ներքին տնտեսական աճի պոտենցիալ, որն այսօր ինքնուրույն, անկաշկանդ դրսևորվում է։ Երկրորդը՝ սկսել է թափ առնել փոքր բիզնեսը, որը նախկինում գտնվում էր անհավասար պայմաններում և ավելի ճնշված էր։ Նրանք այսօր ավելի ոգևորված են և որոշակի ակտիվություն են ապահովում տնտեսության մեջ։ Խոշոր բիզնեսի հետ կապված կարող ենք հակառակն ասել՝ կամ նրանք նույն դիրքում են, կամ հետ են գնացել։ Եվ երրորդն այն է, որ իմ ասած մոդելով այսօր ներքին ներդրումներ կան։ Ճիշտ է, արտաքին ներդրումներ էլ կան, բայց դրանք դեռևս քիչ են»։