«Մեր համբերության չիբուխը շատ հանգիստ ծխում է, կդիմանանք ձգձգումներին: Բոլոր նրանք, ովքեր փոքրիշատե իրենց վրա զգացել են Մարտի 1-ի ու դրան հաջորդած ամեն ինչը, մեծ համբերության կողքին ունեն նաև շատ մեծ սկզբունքայնություն. արժանապատվությամբ կսպասենք, թե երբ կսկսվի իրական դատավարությունը»,- «Առաջին լրատվական»,-ի հետ զրույցում այս մասին ասաց դրամատուրգ Կարինե Խոդիկյանը՝ անդրադառնալով դիտարկմանը, որ թեև դատարանը մերժեց Ռ. Քոչարյանի խափանման միջոցը փոխելու մասին միջնորդությունը, և նա կշարունակի մնալ անազատության մեջ, պաշտպանական կողմը շարունակում է հնարավորինս ձգձգել Մարտի 1-ի գործով դատավարությունը:
Մեղադրյալ Քոչարյանը Մարտի 1-ի գործը որակել է ՀՀ պատմության ամենախայտառակ քրեական գործը: Կարինե Խոդիկյանի գնահատմամբ նույնպես սա մեր անկախության ժամանակաշրջանի ամենախայտառակ դատավարությունն է. «Մթի, ցրտի, բայց նաև հաղթանակների տարիներին, երբ մենք դիմանում էինք ամեն ինչին, և մեզ ասեին, որ Արցախում կռիվ տվող զինվորներից մեկը, որ պետք է գա Հայաստանում երկրորդ նախագահ դառնա, տարիներ հետո հայտնվելու է մեղադրյալի աթոռին… խայտառակ պատմություն է: Մեր անկախ պետությունը նման դատավարություն չպետք է ունենար, բայց ունի»:
Կ. Խոդիկյանն անդրադարձավ նաև ուժային կառույցների ղեկավարների հրաժարականին՝ ներկայացնելով իր դիտարկումները: «Որքան իջնում է հեղափոխության էյֆորիան, այնքան բարձրանում է հակահեղափոխության էյֆորիան… Բայց ով էլ որ գա, նախկինները թող վերադարձի հույս չունենան»,- ընդգծեց դրամատուրգը:
Մանրամասն՝ տեսանյութում: