Քննչական կոմիտեն հաստատել է վարչապետի ընտանիքին պատկանող «Հայկական ժամանակ» թերթի տեղեկությունն այն մասին, որ ձերբակալվել է ԱԺ աշխատակազմի վարչատնտեսական բաժնի պետ Քոչար Խաչատրյանը, որը, ըստ թերթի տվյալի, ՍԴ նախագահ Հրայր Թովմասյանի սանիկն է: Խաչատրյանը, ըստ ՔԿ-ի, մեղադրվում է պաշտոնեական դիրքի չարաշահմամբ պետության փողը վատնելու համար:
Այս տեղեկությունն առանձնահատուկ է հնչում ոչ միայն ՍԴ նախագահ Հրայր Թովմասյանի հետ լոկ «քավոր-սանիկային» կապի առումով, այլ նաև Թովմասյանի հրաժարականի գործընթացի, որը սկսելու մասին հայտարարել է ԱԺ-ն:
Բանն այն է, որ Ազգային ժողովի «Իմ քայլը» խմբակցությունը սեպտեմբերի 16-ին՝ ՍԴ որոշման հիման վրա Ռոբերտ Քոչարյանի խափանման միջոցի փոփոխության վերաբերյալ Ընդհանուր իրավասության դատարանի վճռի հրապարակման նախօրեին, հայտարարեց ՍԴ նախագահի պաշտոնանկության գործընթաց սկսելու մասին: ԱԺ-ն ունի այդ լիազորությունը, սակայն պաշտոնանկության որոշման իրավասությունն արդեն ՍԴ-ինն է: Այսինքն՝ ինը դատավորները պետք է որոշեն՝ ԱԺ դիմումի հիման վրա պաշտոնանկ անե՞լ Թովմասյանին, թե՞ ոչ: Իսկ այստեղ, ինչպես հայտնի է, հարաբերակցությունը հօգուտ Հրայր Թովմասյանի է, համենայնդեպս՝ երբ գնահատում ենք գոնե մինչ այժմ եղած իրողությունների դիտանկյունից:
Ակնառու է, որ այս պարագայում ԱԺ նախաձեռնած գործընթացը մեծ հավանականությամբ զրկված է հաջողելու հեռանկարից, և դա պատկերացնելը ԱԺ մեծամասնության համար թերևս բարդ չէ: Դա կնշանակի, որ խորհրդարանը սկսում է գործընթաց, որում անհաջողության հավանականությունը, գոնե առկա իրողությունների պայմաններում, ավելի մեծ է, քան հաջողության հնարավորությունը: Բայց արդյոք խորհրդարանը կսկսե՞ր այդպիսի գործընթաց՝ համոզված չլինելով հաջողության առնվազն մեծ հավանականության հարցում: Այլապես հակառակ դեպքում Հրայր Թովմասյանի հաղթանակը կլիներ մեծամասնությանը հասցված քաղաքական բավական ուժեղ հարված, թեև, իհարկե, մյուս կողմից՝ հնարավոր կլիներ այն ներկայացնել որպես ժողովրդավարության հաղթանակ:
Այդուհանդերձ, հաշվի առնելով, թե ինչպիսի ներքաղաքական մթնոլորտում է նախաձեռնվում գործընթացը, պետք է ենթադրել, որ իշխող մեծամասնությունը կա՛մ այն հնարավոր միջոցներով հասցնելու է հաջողության, կա՛մ պարզապես գնում են, այսպես ասած, անհաջողության հեռանկարին՝ մինչ այդ լուծած լինելով Ռոբերտ Քոչարյանի խափանման միջոցի վերաբերյալ որևէ անակնկալ դատավճռի առաջ չկանգնելու հարցը:
Այս համատեքստում էլ հետաքրքիր է, որ ՔԿ-ն ձերբակալում է Հրայր Թովմասյանի սանիկ պաշտոնյային, ինչը հարց է առաջացնում՝ արդյոք Թովմասյանին դնում են սանիկին կամ պաշտոնը «զոհաբերելու» դիլեմայի առա՞ջ:
