«Հայկական ժամանակ» օրաթերթը, իր տեղեկություններով, լուր է հրապարակել, որ Մարտի 1-ի մայր գործով վկայի կարգավիճակով հարցաքննվել է Արցախի նախագահ Բակո Սահակյանը:
ՀՀ հատուկ քննչական ծառայության մամուլի քարտուղար Մարինա Օհանջանյանը լրատվամիջոցներին տեղեկությունը հրաժարվել է մեկնաբանել՝ ըստ էության այն ո՛չ հերքելով, ոչ էլ հաստատելով։
Բակո Սահակյանի աշխատակազմի ղեկավարի տեղակալ Դավիթ Բաբայանն էլ նշում է, որ ինքը նման տեղեկություն չունի։
Չի բացառվում, որ Բակո Սահակյանը հարցաքննվել է մարտիմեկյան իրադարձությունների ժամանակ Արցախից Երևան զորք բերելու հանգամանքների վերաբերյալ:
Արցախի «Միացյալ Հայաստան» կուսակցության նախագահ Վահան Բադասյանն «Առաջին լրատվական»-ի հետ զրույցում, մեկնաբանելով այս տեղեկությունը, նշեց. «Իհարկե, նա անպայման պետք է ներգրավվի գործում։ Ես իմ վերջին հարցազրույցներից մեկում ասել եմ՝ Բակո Սահակյանը ջանասիրաբար կազմակերպել է Մարտի 1-ին Արցախից Երևան մարդկանց ուղարկելու գործընթացը։ Տեսեք, ես ասում եմ՝ մարդկանց և ոչ՝ զորք։ Նա մարդկանց է ուղարկել, որոնց հագցրել են զինվորական շորեր։ Օգանովսկին էլ տեղը տեղին վիզ առնելով ասել է այդ մասին»։
Բադասյանն ընդգծեց. «Ես նորմալ եմ դիտում այդ հարցաքննությունը։ Ի վերջո՝ ամեն ինչի իրավական գնահատականը պետք է տրվի»։
Մեր այն դիտարկմանը՝ արդյոք սի՞ն են այն մտահոգությունները, որ գործում փորձ է արվում ներքաշել նաև Արցախի ղեկավարությանը, Վահան Բադասյանը պատասխանեց. «Ով ուզում է լինի՝ եթե ներքաշված են հանցագործության մեջ, պետք է պատասխան տան, զբաղեցրած պաշտոնը որևէ կապ չունի։ Աշխարհում քիչ չեն եղել դեպքեր, երբ աշխարհի գերակա դերակատարություն ունեցող երկրների ղեկավարները նստել են մեղադրյալի աթոռին. դրանում ոչ մի սարսափելի բան չկա։ Ընդհակառակը՝ օրինակելի երևույթ է և անհրաժեշտության դեպքում պետք է տեղի ունենա»։
Եզրափակելով՝ մեր զրուցակիցն ասաց. «Վտանգավորն այն է, երբ հանցագործությանը գնահատական չի տրվում, ուրիշ ոչ մի վտանգավոր բան այս գործընթացում ես չեմ տեսնում»։