Ֆուտբոլի Հայաստանի Բարձրագույն խմբի առաջնության 7-րդ տուրի կենտրոնական խաղում գործող չեմպիոն «Արարատ-Արմենիան» 1:0 հաշվով առավելության հասավ առաջատար Երևանի «Արարատի» նկատմամբ: Վերջինս 6-րդ տուրից հետո ուներ 16 միավոր, և շատերը խոսում էին այն մասին, որ «Արարատը» վերջապես ուշքի է եկել և վերելքի փուլում է: Այո, «Արարատը» վերելքի փուլում էր և անցկացրած 6 հանդիպումներում ցույց էր տվել գրագետ և որակյալ ֆուտբոլ: Նույնիսկ զարմանալի էր, որ տարիներ շարունակ անլուրջ և անհասկանալի մոտեցումներից հետո տիտղոսակիր թիմը մեկը մյուսի հետևից հաղթանակներ է տանում:
«Արարատի» երկրպագուների ուրախությունը, սակայն, բնականաբար երկար չտևեց: Ավելի ճիշտ՝ տեղի ունեցավ այն, ինչը պետք է տեղի ունենար, առանց որի «Արարատին» պատկերացնել ուղղակի անհնար է: Վերելքի փուլում թիմից հեռացավ գլխավոր մարզիչ Սերգեյ Բոյկոն: Ըստ էության հենց Բոյկոյի շնորհիվ էր ձևավորվել մարտունակ կոլեկտիվ, որի խաղն իսկապես տպավորում էր: «Արարատ-Արմենիայի» դեմ մրցավեճում «Արարատը» ոչնչով աչքի չընկավ՝ ցույց տալով դժգույն խաղ: Ու եթե «Արարատ-Արմենիայի» ֆուտբոլիստները ավելի դիպուկ գտնվեին և իրացնեին մի շարք գոլային պահերը, հաշիվը խոշոր կլիներ:
Այո, տարբեր պատճառներով հրաժարականներ և հեռացումներ կարող են լինել ցանկացած պահի, և դա ինչ-որ տեղ նորմալ երևույթ է: Բայց երբ խոսքը վերաբերում է Երևանի «Արարատին», ստանում ենք բոլորովին այլ պատկեր: Պատկեր, որը բացատրել կամ տրամաբանել չի կարելի: Պատկեր, որն արդեն ծիծաղ է առաջացնում շատերի մոտ:
Նախորդ առաջնության ավարտից հետո «Արարատի» գլխավոր մարզիչ էր նշանակվել Սերգեյ Բուլատովը: 2019/2020 թթ. առաջնությունը դեռ չէր մեկնարկել, երբ Բուլատովը հեռացավ թիմից: Առաջնության մեկնարկից մեկ ամիս անց հեռացավ նաև Բոյկոն: Հիշենք նախորդ մրցաշրջանը: Այն «Արարատը» սկսեց Արմեն Ստեփանյանի գլխավորությամբ, որին փոխարինեց Աբրահամ Խաշմանյանը: Վերջինիս հեռանալուց հետո «Արարատի» գլխավոր մարզչի պարտականությունները կատարում էր Տիգրան Եսայանը: Այս մասնագետն էլ, սակայն, երկար չաշխատեց երևանյան թիմում, և հունիսի վերջին գլխավոր մարզիչ նշանակվեց Բուլատովը:
Մարզչական փոփոխություններին զուգահեռ՝ սկանդալներն ու տհաճ միջադեպերը անպակաս էին «Արարատում»: Թիմի կազմը շարունակ փոխվում էր, սակայն խաղում որևէ դրական տեղաշարժ չէր նկատվում: «Արարատը» ձախողել էր մրցաշրջանը՝ առաջնությունն ավարտելով վերջին հորիզոնականում:
Ներկայում «Արարատի» գլխավոր մարզչի պարտականությունները ժամանակավորապես կատարում է Գագիկ Սիմոնյանը: Վերջին մեկ տարվա ընթացքում Սիմոնյանը 6-րդ մասնագետն է, որը գլխավորում է «Արարատը»: Բնական է, որ մոտ օրերս «Արարատը» կունենա նոր մարզիչ:
Այսօր աշխարհում դժվար է գտնել որևէ թիմ, որը մեկ տարվա ընթացքում 7 մարզիչ է փոխել: «Արարատի» ցուցանիշը կարելի է դասել համաշխարհային ռեկորդների շարքին: Որքա՞ն կարելի է խաղալ թիմի հետ: Ինչո՞վ Բոյկոն ձեռնտու չէր: Մասնագետ, որի գլխավորությամբ երկար տարիներ անց «Արարատը» հայտնվել էր առաջին հորիզոնականում: Գրանցված արդյունքը չէ՞ր գոհացնում «Արարատի» ղեկավարներին: Շատերի համար պարզ է, որ Բոյկոն հեռացել է հերթական տհաճ միջադեպի հետևանքով, որոնք դարձել են «Արարատի» «զարդը»:
Ընդամենը 8 օր առաջ Բոյկոն հարցազրույց էր տվել ռուսական «Սպորտ-Էքսպրեսին» և մեծ ոգևորությամբ խոսել կատարված աշխատանքի և արդյունքների մասին: «Նոր մարզչական շտաբ է հրավիրվել, լրջորեն փոխել ենք կազմը և մարզումային գործընթացը: Արդյունքն արագորեն եկավ: Հայաստանում իսկապես ոչ ոք նման մեկնարկ չէր սպասում: Հինգ խաղում 13 միավորը ֆանտաստիկա է: Առավել ևս, որ արդյունքը խաղից է բխում: Շատ ցուցանիշներով մենք առաջատարների թվում ենք: Երկրպագուները շոկի մեջ են. նրանք կարծում էին, որ կրկին վերջին-նախավերջին տեղերում ենք լինելու: Ինչպես ասում են՝ քվեարկում են «ոտքերով»: Տնային խաղերի հաճախելիությունը գրեթե տասնապատկվել է: Մարդիկ շնորհակալություն են հայտնում: Տրիբունա են սկսել վերադառնալ մարդիկ, ովքեր ժամանակին խորհրդային տարիների «Արարատն» են տեսել»,- ասել էր ռուս մասնագետը:
Կարծում ենք՝ տրամաբանական էր և օրինաչափ, որ Բոյկոյի հեռանալուց հետո «Արարատը» պետք է պարտվեր: Չենք զարմանա նաև, եթե վաղը, օրինակ, «Արարատի» 7-8 ֆուտբոլիստներ հեռանան թիմից: Ովքե՞ր են կանգնած հեռացումների և սկանդալների հետևում: Այս հարցի պատասխանը շատերը գիտեն: Բայց որքա՞ն: Ինչքա՞ն կարելի է տանջել տիտղոսակիր թիմին, որը տարիներ շարունակ եղել է ու կա հայկական ֆուտբոլի սիմվոլը:
Կարծում ենք՝ ժամանակն է, որ «Արարատի» երկրպագուները դիմեն կոշտ միջոցների բոլորիս կողմից սիրված թիմը փրկելու համար: