«Լոս Անջելեսի հայկական համայնքը անհամբերությամբ սպասում է ՀՀ վարչապետ Նիկոլ Փաշինյանի այցին»,- ԱՄՆ-ում «Առաջին լրատվական»-ի հետ զրույցում ասաց Լոս Անջելեսում ՀՀ գլխավոր հյուպատոս, դեսպան Արմեն Բայբուրդյանը:
Նրա խոսքով՝ ինքը մեկ տարի է, ինչ այդտեղ է աշխատում, և առաջին օրվանից նրան հարցնում են, թե երբ է վարչապետը այցելելու. «Սպասումը վաղուց կա, և երբ արդեն այցելության ժամկետները վերջնականացվեցին, տրամադրությունը շատ տոնական է՝ մանավանդ, որ այցելությունը համընկել է Հայաստանի Անկախության օրվա հետ»:
Մեր զրուցակիցը շատ կարևորեց Սիլիկոնյան հովտում վարչապետի հանդիպումները. «Ավելորդ է ասել, թե բարձր տեխնոլոգիաները ինչ ներուժ են Հայաստանի համար, իսկ Սիլիկոնյան հովիտը այն վայրն է, որը կարող ենք ասել՝ այդ ներուժի սնուցող աղբյուրն է»:
Արմեն Բայբուրդյանը հավաստիացրեց, որ հանդիպումները լինելու են բարձր մակարդակով և շատ գործնական:
Առավել մանրամասն՝ տեսանյութում: