Սեպտեմբերի 22-ին Լոս Անջելեսի Գրանդ պարկում տեղի կունենա ՀՀ վարչապետ Նիկոլ Փաշինյանի հանդիպումը հայ համայնքի ներկայացուցիչների հետ։ Սփյուռքում տիրող տրամադրությունների շուրջ «Առաջին լրատվական»-ի հետ զրույցում «Կալիֆոռնիա Կուրիեր» թերթի գլխավոր խմբագիր Հարութ Սասունյանը, անդրադառնալով հարցին, թե արդյո՞ք ամերիկահայության ներկայությունը կարող է ցուցիչ լինել, թե մեր ամենամեծ գաղթօջախներից մեկում ինչպես են վերաբերվում Հայաստանում տեղի ունեցող իրադարձություններին, նշեց. «Այո՛: Երբ որ թավշյա հեղափոխությունը տեղի ունեցավ, մեծ խանդավառություն ապրեց հայությունն աշխարհով մեկ՝ թե՛ Հայաստանում, թե՛ Սփյուռքում… Լոս Անջելեսում հայությունը վարչապետին ընդունելու է մեծ խանդավառությամբ»:
Մեր զրուցակիցը մտահոգություն հայտնեց այն առումով, որ մեր ժողովուրդը՝ լինելով շատ զգայական, հաճախ ծայրահեղությունների մեջ է ընկնում. «Չէի ուզենա, որ մեր ժողովուրդը չափազանց խանդավառվի և մեծ հույսեր կապի փոփոխությունների հետ՝ ակնկալելով, որ շատ արագ կյանքը կփոխվի: Այնպիսի բարդ հարցեր են կուտակվել Հայաստանում երեսուն տարվա ընթացքում, որ մեկ օրում հնարավոր չէ լուծել: Չեմ ուզում, որ մեր ժողովուրդը մեծ հույսերով տարվի, հետո հուսախաբվի, դա շատ վատ կլինի ոչ միայն կառավարության, այլ նաև ժողովրդի համար… Մարդիկ կարող են արտագաղթել: Հույս ունեմ՝ մարդիկ համբերությամբ կսպասեն փոփոխություններին և ժամանակ կտան կառավարությանը՝ ավելի լավ որոշումներ կայացնելու համար, քանի որ շատերը դեռևս անփորձ են»:
Հայաստանի վարչապետը բարձր մակարդակի հանդիպումներ չի ունենալու ԱՄՆ պաշտոնյաների հետ: «Թրամփը և Փաշինյանը հանդիպելու հատուկ պատճառ չունեն, երկկողմանի օրակարգում հրատապ հարցեր չկան,- նշեց Հարութ Սասունյանը: -Մենք պետք է մեր բարձրության վրա մնանք, երկիրը առաջադիմի և զարգանա, և Թրամփն ինքը ցանկություն կհայտնի հանդիպել մեր վարչապետի հետ»:
Մանրամասն՝ տեսանյութում:
