ԱԱԾ տնօրեն Արթուր Վանեցյանը հեռացվեց պաշտոնից: Ակնահյտ է, որ իշխանության ներսում նոր վերադասավորումներ են կատարվում, չի բացառվում եմ նաև ներիշխանական ճգնաժամի ի հայտ գալը, քանի որ ինչպես երևում է այդ հեռացման հիմքում լուրջ խմորումներ են թաքնված: Իր հրաժարականի տեքստում Վանեցյանը բավականին լուրջ քաղաքական հայտարարություններ էր արել, ըստ ամենայնի վարչապետին մեղադրելով տարերային որոշումներ կայացնելու, հախուռն գործողությունների և երկրորդականը առաջնայինից չտարբերակելու մեջ: Իսկ իր բուն հրաժարականը ԱԱԾ նախկին տնօրենը ներկայացրել էր որպես «կանգ առ», սթափեցնող քայլ, ինչը նույնպես չափազանց ուշագրավ հայտարարություն էր: Կանգ առ ինչից կամ էլ ինչը պետք է կանգնեցվի, որը Վանեցյանի կարծիքով այդքան խանգարում է պետականշինության գործին:
Ուշագրավ էր նաև վարչապետի մամուլի քարտուղարի պատասխանը, որից կարելի է ենթադրել, որ վարչապետը խոսնակի շուրթերով ակնարկում է խնդրի ներբերանգների մասին: Մասնավորապես Կարապետյանը նշում է, թե պետք է պարզել, թե ով է գրել Արթուր Վանեցյանին վերագրվող այդ տեքստը: «Հույս ունենք՝ դրա հեղինակը քրեական պատասխանատվությունից «թյուրիմացաբար» խուսափած կոռուպցիոներների PR գրասենյակները չեն: Գեներալ Վանեցյանին հորդորում ենք չկորցնել սպայի արժանապատվությունը, որին ինքը հղում է անում»- ասված է հայտարարության մեջ:
Վանեցյանի հրաժարականի տեքստից և խոսնակի արձագանքից կարող ենք ենթադրել, որ ինչ-որ լուրջ կոնֆլիկտ է առաջացել և կոնֆլիկտն այդ այնուամենայնիվ կապված է Վանեցյանի քաղաքական ստվերային գործունեության հետ: Ենթադրվում է, որ ԱԱԾ տնօրենն արդեն վաղուց դուրս էր եկել իր բուն լիազորությունների շրջանակից և քիթը քաղաքականության և քաղաքական անցուդարձերի մեջ էր մտցնում: Նույնիսկ փորձում էր քաղաքական ստվերային թիմ ստեղծել ու առաջ քաշել իր համար նախընտրելի քաղաքական օրակարգերը: Կարծիք կա նաև, որ նա կապեր էր հաստատել նախկին ռեժիմի ներկայացուցիչների՝ մասնավորապես Սերժ Սարգսյանի փեսա Միքայել Մինասյանի հետ: Մի՞թե գեներալը փորձում էր տապալել Փաշինյանի վարչակազմն ու իշխանությունը կենտրոնացնել իր ձեռքում:
Ինչպես տեսնում ենք Վանեցյանը լրջագույն քաղաքական ամբիցիաներ ուներ և ի վերջո դարձավ հենց իր ամբիցիաների զոհը: Իսկ վարչապետին մնում է միայն առավել վստահելի և պրոֆեսիոնալ ԱԱԾ տնօրեն գտնել, քանի սա առաջին հերթին մեր պետության անվտանգության ու խաղաղ գոյակցության խնդիրն է: