Երեխաների մեծ մասի օրգանիզմը պլաստիկ է պարունակում: Այսպիսի եզրահանգման են եկել Գերմանիայի շրջակա միջավայրի դաշնային գրասենյակի և Ռոբերտ Կոխի ինստիտուտի հետազոտողները:
Երեք տարի շարունակ նրանք ուսումնասիրել են 3-ից 17 տարեկան երեխաների և դեռահասների մեզը (ընդհանուր առմամբ եղել է 2500 մասնակից): Պարզվել է, որ հետազոտվածների 97 տոկոսի մոտ 11 տեսակի պլաստմասսայի հետքեր կան: Դրանք երեխաների օրգանիզմում են հայտնվում խաղալիքների, ջրի պլաստիկ շշերի, մթերքի փաթեթավորման միջոցով, գրում է Der Spiegel-ը:
Գիտնականներին հատկապես անհանգստացնում է երեխաների մոտ քաղցկեղածին պերֆտորոկտանային թթվի (PFOA) առկայությունը:
Ուսումնասիրությանը մասնակցած երեխաների մեծամասնության մոտ դրա կոնցենտրացիան եղել է թույլատրելի նորմի վերին սահմաններին, իսկ փոքր երեխաների մոտ՝ նորմայից երկու անգամ բարձր:
Գերմանացի թունաբանները կարծում են, որ պլաստիկ տարաները պետք է արգելվեն, ինչպես նաև մանկական սննդի արտադրության մեջ հրաժարվեն նյութերի օգտագործումից, որոնք պլաստիկի հետ շփվելիս կարող են թունավոր նյութեր արտազատել:
