Նորքի զինված խմբի պարագլուխ համարվող Արթուր Վարդանյանը 1 մլն դրամ գրավի դիմաց ազատ է արձակվել: Ըստ ԱԱԾ-ի՝ այս գործով գլխավոր մեղադրյալ Արթուր Վարդանյանի գլխավորությամբ 20 հոգանոց զինված խումբը ծրագրել էր իշխանությունը բռնությամբ զավթել:
ԱԱԾ-ի հաղորդմամբ՝ Վարդանյանն իր զինված խմբով ցանկացել է թռիչքի պահին խոցել Հայաստանի նախագահի օդանավը, հարձակում գործել նախագահի նստավայրի, Ազգային ժողովի, Սահմանադրական դատարանի, Կառավարության և Հանրային հեռուստաընկերության շենքերի վրա։
Մամուլում նախկինում խստորեն քննադատվում էր «Սասնա ծռերի» անդամների խափանման միջոցի փոփոխությունը՝ այն կոնտեքստում, որ դա կարող է հետագայում զինված գործողությունների համար վատ նախադեպ լինել։ Իսկ Արթուր Վարդանյանի խափանման միջոցի փոփոխությունը էլ ավելի ուժեղ քննադատության արժանացավ։
Քաղաքագետ Գագիկ Համբարյանի կարծիքով՝ Նիկոլ Փաշինյանն ի սկզբանե որոշել է սեփական շահերը, իր քաղաքական թիմի շահերը վեր դասել պետության շահերից. «Ի սկզբանե նույն բանը տեղի ունեցավ «Սասնա ծռերի» ազատ արձակումով։ Այստեղ ես ոչ թե կասկածի տակ եմ դնում նրանց մեղավորությունը կամ չեմ հավատում իշխանությունների անաչառությանը, այլ «Սասնա ծռերը» իրենք իրենց ներկայացուցիչներին էին մեղադրում մարդասպանության մեջ։ Հիշում եք՝ դատական պրոցեսներին նույն Պավլիկ Մանուկյանն ու մյուսները նշում էին, թե ով ում վրա է կրակել, դրանից հետո նրանց մեծ մասը հայտնվեց ազատության մեջ։ Խնդիրը հետևյալն է՝ դատարաններում տեղի ունեցող գործընթացներն ունեն բացահայտ քաղաքական ենթատեքստեր։ Իշխանություններին բացարձակ չի հետաքրքրում՝ այդ անձինք մեղավո՞ր են, թե՞ ոչ, բոլորին ազատ են արձակում»,- «Առաջին լրատվական»-ի հետ զրույցում ասաց նա։
Իսկ թե ինչ նպատակներ ունի այդ ամենը, ըստ Համբարյանի, պարզ կդառնա առաջիկայում. «Ինչքան այս տիպի խմբավորումներ կան, պարոն Փաշինյանը փորձում է լավություն անել՝ ինչ-որ ակնկալիքներ ունենալով նրանցից ապագա քաղաքական գործընթացների համար»։
Քաղաքագետի դիտարկմամբ՝ սա վտանգավոր նախադեպ է: «Պարոն Փաշինյանն ու իր թիմը մտածում են ոչ թե իրական արդարադատության մասին, այլ սեփական շահերի, իսկ դա կործանարար է լինելու։ Եթե պետք է ազատ արձակվեն, ապա՝ ըստ օրենքի։
Ինչի՞ հիման վրա են նրանք ազատ արձակվում։ Նույն «Սասնա ծռերի» անդամները իրենց գործընկերներին մեղադրել են մարդասպանությունների մեջ։ Իհարկե, սա շատ մեծ վտանգ է պարունակում՝ մանավանդ Հայաստանում, որն ունի բազմաթիվ ներքին ու արտաքին խնդիրներ։ Մեզ միայն պակասում էր, որ քաղաքական դաշտում ռազմաքաղաքական խմբավորումներ հայտնվեին։ Ես անձամբ դրան կտրականապես դեմ եմ»,- եզրափակեց նա։
ԳԽ պատգամավոր Ազատ Արշակյանը մեզ հետ զրույցում մշտապես դեմ է արտահայտվել զինված ճանապարհով խնդիրների կարգավորմանը։ «Առաջին լրատվական»-ի հետ զրույցում Արշակյանն ասաց, որ այժմ վտանգներ չի տեսնում. «Քանի որ «Սասնա ծռերն» ասել են, որ այսուհետ սահմանադրական ճանապարհով են քաղաքական գործունեություն ծավալելու՝ ես դա ընդունում եմ որպես լուրջ հայտարարություն։ Բացի դրանից՝ այժմ Հայաստանը փոխվել է, Հայաստանում կարելի է քաղաքական պայքար սկսել ու հասնել հաջողության, որովհետև չկան քաղաքական խոչընդոտներ։ Հիմա զինված պայքարն անիմաստ է»։
Այդ իմաստով, ըստ մեր զրուցակցի, բնական է, որ նրանք պետք է ազատ արձակվեին. «Եթե արյունոտ չի գործը, կարելի է, թող միանան մյուսներին ու քաղաքական պայքար տանեն քաղաքական մեթոդներով։ Հիմա պատճառը վերացվել է, հետևանքները նույնպես պետք է վերանան»։
