Այսօր՝ սեպտեմբերի 16-ին, Ազգային ժողովում շարունակվում են աշխատանքները: Այժմ քննարկվում է Քրեական օրենսգրքում փոփոխություն կատարելու մասին հարցը:
Արտահերթ ելույթով հանդես եկավ ԱԺ նախագահ Արարատ Միրզոյանը: «Հետևելով ՍԴ-ում և դրա շուրջ տիրող իրավիճակին՝ չեմ կարող չկիսել այդ կապակցությամբ հանրության շրջանում տեղ գտած մտահոգությունները»,- հայտարարեց նա:
ԱԺ նախագահի խոսքով՝ Ռոբերտ Քոչարյանի դիմումի հիման վրա գործը քննելիս և իր որոշումը կայացնելիս Սահմանադրական դատարանը պատշաճ քննարկման առարկա չի դարձրել և կամ առանց հիմնավոր պատճառաբանության մերժել է առերևույթ կողմնակալության հիմքով ՍԴ երեք անդամի՝ գործի քննությանը մասնակցության անհնարինության վերաբերյալ ՍԴ դատավորի դիմումը՝ դրանով իսկ հանրության շրջանում կասկածի տակ դնելով անաչառ դատարանի ապահովումը:
Նա նշեց, որ ՍԴ հատուկ կարծիքների դեպքում տվյալ զեկուցողի կողմից ուղղակիորեն մատնանշվել է, որ դատարանը չհիմնավորված շտապողականություն է ցուցաբերել այս որոշման ընթացքում և արձանագրել է, որ որոշումը կարող էր այլ լինել, եթե չլիներ այդպիսի շտապողականություն: «Այս ճանապարհով կայացված որոշումն ուղղակիորեն առնչվում է այլ դատական ատյանում քննվող մի գործի, որի շրջանակներում մեղադրանքը վերաբերում է Հայաստանում ժողովրդավարության և սահմանադրական կարգի դեմ ուղղված ոտնձգություններին: Առանց որևէ առերևույթ հիմնավորման ՍԴ-ն էականորեն շեղվել է օրենսդրական բացի առնչությամբ առավել քան 1 տասնամյակ իր իսկ արտահայտած իրավական դիրքորոշումից»:
Նա հավելեց, որ մինչ այսօր չեն փարատվել կասկածները, թե ինչ ընթացակարգով է ՍԴ-ն դիմումներ ներկայացրել ՄԻԵԴ և Վենետիկի հանձնաժողով. «Սդ-ն մինչ օրս ԱԺ չի ներկայացրել ՄԻԵԴ և Վենետիկի հանձնաժողով հղած իր դիմումների հայերեն տեքստը»:
«Ես կարծում եմ, որ ՀՀ Ազգային ժողովը Սահմանադրությամբ իրեն վերապահված լիազորությունների շրջանակում իր դիրքորոշումը պետք է հայտնի վերը նկարագրված խնդիրների և իրավիճակի կապակցությամբ»:
Մանրամասները՝ տեսանյութում: