Լուրեր
Քիմ Քարդաշյանի ներկայությունը համաշխարհային այս համաժողովին այլ նպատակ ունի
  • 13:15
  • 2019-09-16
  • Դիտումներ՝ *

Հոկտեմբերի 6-9-ը Երևանում տեղի է ունենալու «WCIT 2019» Տեղեկատվական տեխնոլոգիաների համաշխարհային համաժողովը: Երևանյան համաժողովին սպասվում է ավելի քան 2000 մասնակից՝ 70 երկրից։ Բոլոր 59 բանախոսներն աշխարհի առաջատար ընկերությունների ղեկավարներ են: Համաժողովին մասնակցելու համար Երևան են ժամանելու Reddit կայքի և «Initialized Capital»-ի հիմնադիր Ալեքսիս Օհանյանը, բարձր-նորարարական ծրագրային ապահովման «Infosys» ընկերության հիմնադիր Նարայանա Մրթին, բանախոս Գարի Վայներչուկը, «Մայքրոսոֆթ» կորպորացիայի փոխնախագահը, Համաշխարհային գերաստղ Քիմ Քարդաշյանը, բարձր տեխնոլոգիաների, տիեզերական, ռազմական, բանկային, առողջապահական ու այլ ոլորտների հայտնի ներկայացուցիչներ:

Առաջատար տեխնոլոգիաների ձեռնարկությունների միության նախագահ Կարեն Վարդանյանն «Առաջին լրատվական»-ի հետ զրույցում ընգծեց, որ համաշխարհային համաժողովը հիմնադրել է Տեղեկատվական տեխնոլոգիաների և ծառայությունների համաշխարհային դաշինքը՝ WITSA-ն, որի անդամ է նաև Առաջատար տեխնոլոգիաների ձեռնարկությունների միությունը: «Մենք 4 տարի առաջ Մեքսիկայում հաղթեցինք և ձեռք բերեցինք համաժողովը Հայաստանում անցկացնելու իրավունքը, և արդեն 4 տարի է պատրաստվում ենք հյուրընկալությանը»,- նշեց Կ. Վարդանյանը: -Հայաստան են գալու ոլորտի լիդերները, նպատակային համադրություն է, գալիս են քննարկելու համաշխարհային հարցեր, նաև տեսնելու Հայաստանի ներուժը: Հայաստանն այսօր որոշ ոլորտներում առաջատարների կազմում է, օրինակ՝ միկրոէլեկտրոնիկայի ոլորտում աշխարհի առաջին հնգյակում ենք, սոցիալական ցանցերի ոլորտում առաջատար ընկերություններ ունենք…»:
Կարեն Վարդանյանի հավաստմամբ՝ համաժողովը ամենամասշտաբայինն է և միջազգային պետական մասնակցությամբ աննախադեպ է. արդեն 33 երկրների նախարար հաստատել են, որ մասնակցելու են:

Միջոցառման շրջանակում Հանրապետության հրապարակում կկազմակերպվի համերգ, առաջին անգամ կհնչի արհեստական բանականությամբ ստեղծված երաժշտություն, հրավիրել են երաժիշտներ այն 16 երկրներից, որտեղ մինչև այժմ անցկացվել է ՏՏ համաժողովը: Նրանց համախմբելով՝ կստեղծվի նվագախումբ՝ Սերգեյ Սմբատյանի գլխավորությամբ. նվագախմբում նաև հայ երաժիշտներ կլինեն: Նաև հայ կոմպոզիտորների երաժշտություն կհնչի: Համերգային ծրագրին կմասնակցի նաև Armin Van Buuren-ն, ով այսօր աշխարհի առաջատար DJ-ներից է:

Հարցին, թե մտավախություն չկա՞, որ սոցմեդիայում հայտնի գերաստղ Քիմ Քարդաշյանը կստվերի մյուս բանախոսներին, Կարեն Վարդանյանը նշեց. «Քարդաշյանը սոցիալական մեդիան լավագույնս օգտագործող բիզնեսմեններից մեկն է…Մենք հրավիրեցինք և նա սիրահոժար համաձայնեց: Կան մարդիկ, որ քննադատում են՝ ասելով՝ Քարդաշյանն ինչո՞ւ պետք է մասնակցի IT համաժողովին, մյուս մասը դա համարում է հրաշալի մարքեթինգային քայլ, որով ուշադրություն է սևեռվում Հայաստանի վրա: Հիմա համաժողովը շատ ավելի նկատված կլինի… Համաժողովը բովանդակային առումով էլ շատ հզոր է»: Կարեն Վարդանյանը ներկայացրեց նաև համաժողովի նպատակները:

 

Մանրամասն՝ տեսանյութում:

  • Դիտումներ՝ *