ԱԺ պատգամավոր Արման Բաբաջանյանը ֆեյսբուքյան իր էջում գրել է.
Անցնող շաբաթ իմ կողմից Ռուսաստանի վերաբերյալ որոշ հայտարարություններ, Հայաստանում Ռուսաստանի ներգրավվածության աստիճանի մասին որոշ մտքեր տարատեսակ մեկնաբանությունների առիթ են տվել։
Խորապես համոզված եմ, որ Ռուսաստանի հետ Հայաստանի երկկողմ հարաբերությունների պոտենցիալը մինչև վերջ օգտագործված չէ։
Հայաստանն ու Ռուսաստանը պետք է խորացնեն, զարգացնեն ու ընդլայնեն հարաբերությունները հարգելով միմյանց սուվերենությունն ու անկախությունը։ Մինչ օրս հայ-ռուսական հարաբերություններում բացակայել է հենց այդ հարգանքը։
Ընդհանրապես պետք է ասել, որ Ռուսաստանին որևէ խնդրում «ոչ» ասելու համար Հայաստանին անհրաժեշտ է մինչ դրա պահը գալը հնարավորինս բարեփոխել երկրի քաղաքական և տնտեսական համակարգերը, նաև փոխել իշխող մտածողությունն առ այն, որ Հայաստանի ապագայի միակ հուսալի հենարանը դա Ռուսաստանն է: Ռուսաստանն ընդամենը մեկն է այն պետություններից, որոնց հետ Հայաստանը պետք է աշխատի իր պետական շահը սպասարկելու համար, բայց Ռուսաստանը ամենևին միակը չէ և Հայաստաում պետք է փոխվի հասարակական այդ գերիշխող մտածողությունը: Երբ հասարակական մտածողությունը փոխվի, Ռուսաստանի համար այլևս շատ դժվար կլինի ճնշել Հայաստանի իշխանությանը, որովհետև նախկինում էլ այդ ճնշումների գլխավոր հենքը ոչ այնքան Հայաստանի իշխանության համադեմոկրատական բնույթն էր կամ տնտեսական կախվածությունը Ռուսաստանից, որքան հասարակության մտածողության մեջ ռուսամետության գերիշխումը:
Բայց, ինչպե՞ս պետք է փոխի Հայաստանի ժողովրդավարական իշխանությունը հասարակության այդ մտածողությունը:
Դա փոխելու համար պետք է պարզապես երկրի արդիականացման իրական գործընթաց սկսել և ցույց տալ, որ Հայաստանն ամենևին միայն Ռուսաստանով չէ, որ կարող է ապահովել իր անվտանգությունն ու բարեկեցությունը, որ Հայաստանը կարող է զարգանալ արևմտյան արժեհամակարգի հետ գործակցելով, իրական եվրոպական արժեքների քաղաքական ու տնտեսական ադապտացիայի շնորհիվ, ներգրավելով ներդրումներ թե՛ արտերկրի ներդրողների, թե՛ արտերկրում բնակվող սփյուռքահայերի կողմից:
https://www.facebook.com/babajanyana/photos/a.2309525339078180/2712121372151906/?type=3&theater
