Խորհրդարանում մեկնարկում է «Կուսակցությունների մասին» օրենքի, ինչպես նաև Ընտրական օրենսգրքի փոփոխությունների քննարկման փուլը։ Մասնակցություն են ունենալու ինչպես խորհրդարանական, այնպես էլ արտախորհրդարանական ուժերի ներկայացուցիչներ: Աշխատանքները համակարգող «Իմ քայլը» խմբակցության պատգամավոր Համազասպ Դանիելյանը որոշակի մանրամասներ է փոխանցել՝ մասնավորապես «Կուսակցությունների մասին» օրենքում նախատեսվելիք փոփոխությունների մասին։ Ըստ նրա՝ հնարավոր են փոփոխություններ այն կուսակցությունների գործունեության հետ կապված, որոնք համապետական ընտրություններին չեն մասնակցում, հնարավոր է՝ գրանցումից զրկվեն։
Նաև հնարավոր է դրույթ, որով կապահովվի կուսակցությունների ֆինանսական հաշվետվությունը, այսինքն՝ հանրությունը կիմանա, թե որ կուսակցությունն ով է ֆինանսավորում։
Քաղտեխնոլոգ Վիգեն Հակոբյանի կարծիքով՝ եթե նշված դրույթներն ի կատար ածվեն, ապա դա կնպաստի կուսակցական համակարգի ձևավորմանը։ «Այնքան կուսակցություն կա, որ մենք դժվար ենք պատկերացնում նրանց գործունեությունը։
Օրը մեջ ստեղծվում ենք, բայց չենք հիշում այնպիսիներին, որոնք փակվում են։ Կուսակցությունների ճնշող մեծամասնությունը ոչ թե երկու անգամ անընդմեջ, այլ շատ անգամ չեն մասնակցել համապետական ընտրություններին։
Դա մեխանիկորեն կբերի կրճատման»,- «Առաջին լրատվական»-ի հետ զրույցում ասաց նա։
Հակոբյանն ընդգծեց՝ կան կուսակցություններ, որ նույնիսկ մարդ-կուսակցություն չեն, մնացել է ընդամենը կնիքը, գրանցման վկայականը. «Սա այն դեպքն է, որ կուսակցություն է՝ թող մի հատ էլ դրանից լինի։ Այս առումով նշված փոփոխությունը օգուտ կտա, կբերի մեխանիկական կրճատման, և կունենանք բալանսավորված վիճակ։ Թեպետ նորից եմ նշում՝ ինչքան կրճատվեն, այնքան էլ կստեղծվեն»։
Ինչ վերաբերում է ֆինանսական աղբյուրների հրապարակմանը, մեր զրուցակիցն ասաց. «Ես ավելի հոռետես եմ այս հարցում։ Կան բազմաթիվ մեխանիզմներ, որով հնարավոր կլինի շրջանցել։ Հիմա էլ ընտրություններին մասնակցողները հաշվետվություն են տալիս՝ ինչպես են ծախսում, ինչպես են գոյանում այդ միջոցները, բայց դրանք ֆորմալ բնույթ են կրում, բոլորը հասկանում են, որ դրանք կեղծ են։ Իրականում ֆինանսական միջոցները չեն գոյանում միայն նվիրատվություններից։ Այս առումով, ես կարծում եմ, որ եթե հաշվետվության մեխանիզմը գործի՝ կուսակցությունների ֆինանսավորումը թափանցիկ կդառնա, ինչը շատ կարևոր է, որովհետև շատ դեպքերում ֆինանսավորվելով ներքին աղբյուրներից, առավել ևս դրսից, մի կարգախոսով հանդես են եկել, բայց հետագայում սպասարկում են իրենց ֆինանսավորողների շահերը՝ թե՛ ներսից և թե՛ առավել վտանգավոր է՝ դրսից։ Այս առումով ես մի փոքր հոռետես եմ, չեմ կարծում, թե այդ մեխանիզմները միանգամից սկսեն աշխատել»։
Օրերս ստեղծված կուսակցություններից մեկը, օրինակ, հայտարարեց, որ ընտրություններին մասնակցելու մտադրություն չունի։ Մեր այն դիտարկմանը, թե այդ դեպքում ո՞րն է կուսակցության գոյության իմաստը, Վիգեն Հակոբյանը պատասխանեց. «Երբ որևէ քաղաքական ուժ հայտարարում է, որ ընտրություններին չի մասնակցում, նշանակում է՝ տվյալ ուժը համարում է, որ ընտրությունների մեխանիզմով Հայաստանում իշխանափոխություն տեղի չի ունենա։ Այլ մեխանիզմներն էլ երկուսն են՝ կա՛մ հեղափոխություն, կա՛մ պալատային հեղաշրջում։ Հիմա եթե քաղաքական ուժն ասում է, որ նպատակ չունի ընտրություններին մասնակցել, նշանակում է՝ ընտրական մեխանիզմներին չի հավատում, ինչն էլ քաղաքական դիրքորոշում է։ Այսպիսի մոտեցումը գոյության իրավունք ունի։ Տվյալ դեպքում իրենք չեն հավատում նաև ընտրողների ճիշտ ընտրությանը, ամեն դեպքում դա քաղաքական մոտեցում ու բովանդակություն ունի»։
Քաղտեխնոլոգի կարծիքով՝ Հայաստանում կարող է լինեն զանգվածներ, որոնք արդար ընտրությունների չեն հավատում։
Ի վերջո, այսօր իշխանության եկած ուժն էլ հենց այդ կարգախոսով էր հանդես գալիս։ Այլ հարց է, որ եթե իսկապես «Կուսակցությունների մասին» օրենքը փոխվի, և երկու անգամ ընտրությունների չմասնակցած ուժին գրանցումից զրկեն՝ նրանք կհայտնվեն ռիսկային գոտում։ Մենք կարող ենք չհամաձայնել իրենց դիրքորոշման հետ, բայց այս հայտարարությամբ իրենք իրենց վերաբերմունքն են ցուցաբերում այսօրվա համակարգին, այսօրվա ընտրողների ադեկվատությանը»։
