Ա սերիայի երրորդ տուրի շրջանակներում վաղը «Ռոման» Հռոմի «Օլիմպիական» մարզադաշտում կմրցի «Սասուոլոյի» հետ: Այս պահին «Ռոման» 2 միավորով 15-րդն է, իսկ «Սասուոլոն» 3 միավորով 8-րդը: Առաջին տուրում պորտուգալացի մասնագետ Պաուլու Ֆոնսեկայի թիմը սեփական հարկի տակ 3:3 էր խաղացել «Ջենոայի» հետ, իսկ երկրորդ տուրում՝ մեկ միավոր էր վաստակել սկզբունքային մրցակից «Լացիոյի» դեմ մրցավեճում: Վերջին շրջանում շատ է խոսվում է, որ «Ռոման» ուժեղացնելով կազմը լուրջ հավակնություններ ունի ընացիկ առաջնությունում:
Մասնավորապես թիմի առաջ խնդիր է դրված տեղ զբաղեցնել Ա սերիայի լավագույն քառյակում և հաջորդ մրցաշրջանում խաղալ Չեմպիոնների լիգայի խաղարկությունում: Այս տարի «Ռոման» խաղալու է Եվրոպա լիգայի խաղարկությունում և պայքարը սկսելու է խմբային փուլից:
Հավանականությունը մեծ է, որ վաղը Ֆոնսեկայի թիմն առաջին հաղթանակը կտանի ընթացիկ առաջնությունում և կբարելավի դիրքը մրցաշարային աղյուսակում:
Ամառային տրանսֆերային պատուհանի ընթացքում «Ռոման» լուրջ համալրումներ է ունեցել: Բացի Հայաստանի ազգային հավաքականի ավագ Հենրիխ Մխիթարյանից «Ռոմա» է տեղափոխվել «Մանչեսթեր Յունայթեդում» մեր ֆուտբոլիստի խաղընկեր կենտրոնական պաշտպան Քրիս Սմոլինգն ու ֆրանսիացի կիսապաշտպան Ժորդան Վերետուն «Ֆինորենտինայից»: Առաջինա խաղից առաջ «Ռոման» կադրային լուրջ խնդիրներ ունի: Մասնավորապես, վերջերս վնասվածք էր ստացել թուրք կիսապաշտպան Չենգիզ Ունդերը: Բուժզննումից հետո պարզ է դարձել, որ Ունդերը շարք կվերադառնա միայն հոկտեմբերին: Վնասվածքից դեռևս չի ապաքինվել մեկ այլ կիսապաշտպան Դիեգո Պերոտին: Ըստ իտալացի վերլուծաբանների առջևի գիծը ուժեղացնելու նպատակով Ֆոնսեկան «Սասուոլոյի» դեմ խաղում Մխիթարյանին կընդգրկի մեկնարկային կազմում: Նշվում է, որ Մխիթարյանը հիանալի մարզավիճակում է և միանշանակ պատրաստ է օգնել իր նոր թիմին: Սպասվում է, որ «Ռոման» վաղը կպայքարի 4-2-3-1 դասավորությամբ:
Մասնավորապես դարպասում կլինի Լոպես, իսկ պաշտպանության կենտրոնում Ֆասիոն և Սմոլինգը: Կոլարովը կխաղա պաշտպանության ձախ, իսկ Ֆլորենցին՝ աջ եզրում: Հենակետային գոտում կլինեն Պելեգրինին և Կրիստանեն: Հենրիխ Մխիթարյանին ամենայն հավանականությամբ կտեսնենք կիսապաշտպանության աջ եզրում, իսկ ձախ եզրում կգործի Կլյուվերտը: Ենթահարձակվողի դիրքում կխաղա Ձանոլոն, իսկ հարձակման կրակագծում՝ Ջեկոն: Ամեն դեպքում չի բացառվում, որ Ֆոնսեկան Մխիթարյանին օգոտագործի նաև 10 համարի դիրքում: Ա սերիայի երկու հանդիպումներում «Ռոմայի» կազմում ենթահարձակվողի դիրքում խաղացել է հենց Ձանոլոն:
Շատերը տրամաբանական են համարում, որ Մխիթարյանին միջոցով Ֆոնսեկան կփորձի լրացնել կիսապաշտպանության աջ եզրում առաջացած բացը: Պետք է ընդունենք նաև, որ «Ռոմայում» առկա կադրային խնդիրները լավ հնարավորություն են Մխիթարյանի համար կարճ ժամանակում դրսևորվելու և դառնալու մեկնարկային կազմի ֆուտբոլիստ: Բուքմեյքերներն այս մրցավեճում ֆավորիտ են համարում «Ռոմային»: Դաշտի տերերի հաղթանակի համար սահմանված է 1․7 գործակից: Ոչ-ոքին գնահատված է 4․2, իսկ «Սասուոլոյի» հաղթանակը՝ 4․8 գործակցով: «Ռոմա»-«Սասուոլո» հանդիպումը կսկսվի Երևանի ժամանակով 20-ին: