Խիստ կախվածություն առաջացնող Oxycontin անալգետիկ (ցավազրկող) դեղամիջոց արտադրող Purdue Pharma ընկերությունն ԱՄՆ-ին 12 միլիարդ դոլար փոխհատուցում է առաջարկել՝ օփիոիդային ճգնաժամի մեջ իր մասնակցության համար: 23 նահանգներ և տարածքներ համաձայն են գործարքին, մնացածների մեծամասնությունը դեմ է, հայտնում է Bloomberg-ը՝ հղում անելով իրավիճակին մոտ աղբյուրներին:
Եթե գործարքը հավանության արժանանա, Purdue-ի սեփականատեր Սաքլեր ընտանիքն իրեն սնանկ կհայտարարի և կորպորացիան կփոխանցի կառավարությանը: Նման պլանին համաձայն են հիմնականում հանրապետականների վերահսկողության տակ գտնվող նահանգները՝ Տեխաս, Օհայո, Ֆլորիդա, Թենեսի և այլք: Նրանք գտնում են, որ ամենակարևորը հնարավորինս շուտ փոխհատուցում ստանալն է:
Գործարքի հակառակորդները, մասնավորապես Նյու Յորքի և Կոնեկտիկուտ նահանգների իշխանությունները, կարծում են, որ 12 միլիարդը բավարար չէ տեղի ունեցածից վնասը վերականգնելու համար: Պաշտոնական տեղեկատվության համաձայն, դեղագործների կողմից հրահրված ճգնաժամի արդյունքում մահացել է ավելի քան 400 հազար մարդ: Ավելի քան երկու միլիոն ամերիկացիներ դեռ տառապում են ափիոիդային կախվածությունից:
Աղբյուրների համաձայն, Սաքլերները նման լուծում են առաջարկում, որպեսզի խուսափեն ավելի մեծ կորուստներից՝ յուրաքանչյուր նահանգի ներկայացրած առանձին հայցերի դեպքում: Բացի այդ, դառարանում կարող է հայտնվել ոչ միայն ընկերությունը, այլև դրա սեփականատերերը:
