Փողոցային նկարիչ Բենքսին Instagram-ի իր էջում առաջին անգամ արձագանքել է անգլիական նավահանգստային Դուվր քաղաքում Brexit-ին նվիրված իր ամենահայտնի գործերից մեկի ոչնչացմանը:
Նկարի բնօրինակը, որը գնահատվում էր 1 միլիոն ֆունտ ստեռլինգ (1.24 միլիոն դոլար), քաղաքային շենքի պատին հայտնվել է 2017-ի մայիսին: Գրաֆիտիում պատկերված է Եվրամիության դրոշը և մի մարդ, որը մուրճով հարվածում է դրոշի վրայի աստղերից մեկին:
2019-ի օգոստոսի վերջին գրաֆիտին շրջապատել են փայտամածներով և ներկել: «Օ, ես նախատեսել էի Brexit-ի օրը Դուվրի իմ գործը փոխարինել սրանով: Բայց, ըստ երևույթին, այն ներկել են: Կարևոր չէ: Կարծում եմ, որ սպիտակ դրոշը պակաս արտահայտիչ չէ», – գրաֆիտիի ոչնչացումը մեկնաբանել է Բենքսին և տեղադրել նոր գործի լուսանկարը: Դրանում մարդը նախկինի նման մուրճով հարվածում է աստղին, բայց արդեն դատարկ տեղը. ԵՄ-ի ճմրթված դրոշն ընկած է գետնին:
Բենքսիի նկարների հետ պարբերաբար տարբեր միջադեպեր են տեղի ունենում: Մասնավորապես, 2019-ին Փարիզում գողացան արվեստագետի երկու գրաֆիտիները, որոնցից մեկը նվիրված էր 2015-ին Բաթաքլանի համերգասրահում տեղի ունեցած ահաբեկչական հարձակման զոհերի հիշատակին (մահացավ ավելի քան 130 մարդ, մի քանի հարյուրը վիրավորվեցին), մյուսը գտնվում էր Պոմպիդու կենտրոնի մոտակայքում Փարիզում:
https://www.instagram.com/p/BTywxUDjtJh/?utm_source=ig_embed
