Լուրեր
Քոչարյանի հետ համաձայն եմ՝ սա պատմական դատավարություն է
  • 21:15
  • 2019-09-12
  • Դիտումներ՝ *

Երևան քաղաքի ընդհանուր իրավասության դատարանի Շենգավիթի նստավայրում այսօր մեկնարկեց ՀՀ երկրորդ նախագահ Ռոբերտ Քոչարյանի, Զինված ուժերի Գլխավոր շտաբի պետի պաշտոնը զբաղեցրած Սեյրան Օհանյանի, պաշտպանության նախարարի տեղակալի պաշտոնը զբաղեցրած Յուրի Խաչատուրովի և նախագահի աշխատակազմի ղեկավարի պաշտոնը զբաղեցրած Արմեն Գևորգյանի գործով դատական նիստը, որը մարտիմեկյան գործի մի մասն է կազմում:

Ռոբերտ Քոչարյանն այսօր հայտարարել է, որ սա Հայաստանի պատմության մեջ ամենից խայտառակ քրեական գործն է: Դասագրքերում է նշվելու այս գործի մասին, և այս գործն ունենալու է իր բացասական և դրական հերոսներին: Ինչպիսի՞ն են ձեր տպավորություններն ու մեկնաբանությունները․ «Առաջին լրատվական»-ի հարցին հրապարակախոս Հրանտ Տեր-Աբրահամյանը պատասխանեց․ «Մասամբ համաձայն եմ, որ սա իրոք պատմական դատ է։ Գուցե դարի դատավարություն չէ, բայց պատմական դատ է։ Իսկ այն հայտարարությանը, որ այս դատավարությունը Հայաստանի պատմության մեջ ամենից խայտառակն է, ես դրա մեջ չափից ավելի նարցիսիզմի էլեմենտ զգացի։ Ես բացի այսօրվա դատավարությունից, Մարտի 1-ի գործով ներկա եմ եղել նաև 2008 թվականի դատավարությանը։ Կարող եք ինձ մեղադրել կողմնակալության մեջ, բայց այդ երկու դատերը համեմատելու բան չեն։ Էն աղմուկը, էն վանկարկությունները, որոնք այսօր իրենց թույլ են տալիս Քոչարյանի կողմնակիցները, այն ժամանակ մեզ թույլ չէին տալիս։ Էն պաստառները, որոնք այսօր թույլատրված էր այնտեղ պահել, այն ժամանակ էդպիսի բան հնարավոր չէր։ Եթե մի հատ պաստառ էր բարձրանում, ոստիկանությունն անմիջապես ցրում էր, բազմիցս ուժ է կիրառվել։ Այնպես որ, էդտեղ համեմատելու բան չկա։

Ինչ վերաբերում է բուն դատավարությանը։ Ինձ հետաքրքիր էր լսել և՛ Քոչարյանի կողմի ներկայացված փաստարկները, և՛ մեղադրող կողմի։ Երկու կողմից ես տեսա բովանդակային բանավեճ։ Այն ժամանակ այդպիսի բան չկար։ Նախ՝ մեղադրող կողմի խոսքը շատ թույլ էր, անհիմն էր։ Դուք պետք է տեսնեիք այն ժամանակ այդտեղ հանդես եկող վկաներին․ դա դատավարություն չէր, դա խեղկատակություն էր։ Թող վերցնեն այդ ձայնագրությունները նայեն ու համեմատեն»։

 

 

Մանրամասները՝ տեսանյութում։

  • Դիտումներ՝ *