Երևան քաղաքի ընդհանուր իրավասության դատարանի Շենգավիթի նստավայրում այսօր մեկնարկեց ՀՀ երկրորդ նախագահ Ռոբերտ Քոչարյանի, Զինված ուժերի Գլխավոր շտաբի պետի պաշտոնը զբաղեցրած Սեյրան Օհանյանի, պաշտպանության նախարարի տեղակալի պաշտոնը զբաղեցրած Յուրի Խաչատուրովի և նախագահի աշխատակազմի ղեկավարի պաշտոնը զբաղեցրած Արմեն Գևորգյանի գործով դատական նիստը, որը մարտիմեկյան գործի մի մասն է կազմում: Ինչպիսի՞ն է այս դատավարության նշանակությունը Հայաստանի հետագա զարգացման համար․ «Առաջին լրատվական»-ի հարցին վերլուծաբան Նժդեհ Հովսեփյանը պատասխանեց․ «Ըստ էության, Հայաստանի հետագա զարգացման համար այս դատավարությունն ունի անկյունաքարային նշանակություն, որովհետև մենք խոսում ենք նախորդ արատավոր համակարգի գործունեության ամենացավոտ կետերի և պրոցեսների մասին, դա Մարտի 1-ն է, որտեղ Հայաստանը ծանր հարված է ստացել։ Այս դատավարությունը խոշոր նշանակություն ունի նաև մեր հասարակական հոգեբանության փոփոխության տեսանկյունից»։
Իսկ քաղաքագետ Էդգար Վարդանյանն ասաց․ «Մարտի 1-ի դատավարությունը դա նաև նախկին ավտորիտար ռեժիմի նկատմամբ դատավարություն է։ Եվ այն բազմաթիվ թեզերը, որոնք միշտ հնչեցվել են, որ իշխանությունները մարդու իրավունքների կոպտագույն խախտումներ են իրականացնում, չարաշահում են իրենց լիազորությունները, բռնություններ են կազմակերպում կամ հովանավորում, այս դատավարության ընթացքում կա սպասելիք, որ կհաստատվի, և կոնկրետ մարդիկ պատասխանատվություն կկրեն այդ ամենի համար։ Դա կնշանակի՝ ևս մեկ անգամ Հայաստանի հասարակությունը գիծ է քաշում, որ նման բաներ այլևս անցյալում են, կմնան անցյալում և չեն կրկնվի։ Այսինքն՝ երբեքի փիլիսոփայությունն ավելի առարկայական կարող է դառնալ»։
Մանրամասները՝ տեսանյութում։
