Ապրիլի 3-ին՝ օրվա երկրորդ կեսին, և ապրիլի 4-ի գիշերը հանրապետության լեռնային շրջաններում, Լոռիում, Տավուշի ու Սյունիքի նախալեռնային գոտիներում սպասվում է թաց ձյուն, ճանապարհներին՝ մերկասառույց, առանձին հատվածներում՝ բուք և ցածր տեսանելիություն:
Վաղը՝ օրվա երկրորդ կեսին, ու ամսի 4-ի գիշերը անձրևի հավանականություն կա նաև Երևանում, գիշերային ջերմաստիճանը կլինի դրական: Այս մասին լրագրողների հետ հանդիպմանը հայտնեց ԱԻՆ հիդրոմետ ծառայության օդերևութաբանության կենտրոնի պետ Զարուհի Պետրոսյանը:
Նրա խոսքով՝ առաջիկա գիշերը, քանի դեռ Արարատյան դաշտավայրում ու մայրաքաղաքում կա ձյան ծածկույթ, և ձյունը հալչում է, նաև գիշերը զրոյին մոտ ջերմաստիճանի պատճառով ճանապարհները կսառցակալեն: Նա կոչ արեց առաջիկա գիշերը ևս հանդես բերել զգուշություն:
«Լեռնային ու նախալեռնային շրջաններում վաղը՝ օրվա երկրորդ կեսին, ամսի 4-ի գիշերը ևս ճանապարհները կլինեն ռիսկային: Սպասվում է ձյուն, ճանապարհներին՝ մերկասառույց: Մնացած օրերին կդիտվի առանց տեղումների եղանակ»,- զգուշացրեց բանախոսը:
Ինչ վերաբերում է օդի ջերմաստիճանին, ապա առաջիկա գիշերը լեռնային շրջաններում կանխատեսվում է 7-12 աստիճան ցուրտ, իսկ վաղը ցերեկը օդի ջերմաստիճանը կբարձրանա՝ հասնելով +6-ի: Արարատյան դաշտավայրում կանխատեսվում է մինչև 2 աստիճան տաքություն, իսկ վաղը ցերեկը առավելագույն ջերմաստիճանը կհասնի 15-ի:
Ապրիլի 4-ին օդի ջերմաստիճանը կպահպանվի, ապրիլի 5-ին Արարատյան դաշտավայրում կբարձրանա մինչև 18 աստիճան, ամսի 6-ին կրկին կպահպանվի, իսկ ամսի 7-ի գիշերը կլինի 7 աստիճան տաքություն, ցերեկը՝ մինչև 20 աստիճան:
Ինչ վերաբերում է առաջիկա ցրտահարություններին, ապա բանախոսը նշեց, որ Արարատյան դաշտավայրի համար ռիսկային է ողջ ապրիլ ամիսը: Հիդրոօդերևութաբանի խոսքով՝ վիճակագրությունը ցույց է տալիս, որ նման երևույթների ռիսկը պահպանվում է մինչև ապրիլի կեսերը:
Ինչ վերաբերում է լեռնային շրջաններին, ապա այդտեղ ռիսկային է թե՛ մայիսը, թե՛ հունիսը:
«Հուսանք, որ ցրտահարություններ չեն լինի, սակայն վտանգը պահպանվում է»,- նշեց Զ. Պետրոսյանը:
