ԱՄՆ նախագահ Դոնալդ Թրամփը սեպտեմբերի 10-ին հայտարարել է ազգային անվտանգության հարցերով խորհրդական Ջոն Բոլթոնին պաշտոնանկ անելու մասին: Շատ փորձագետներ Բոլթոնի պաշտոնանկությունը կապում են Իրանի շուրջ զարգացումների հետ: Ինչպես գիտենք, Բոլթոնը արտաքին քաղաքականության մեջ հայտնի է որպես կոշտ գծի կողմնակից, այդ թվում՝ Իրանի հետ հարաբերություններում: Հատկանշական է նաև, որ այս օրերին մամուլում հրապարակումներ եղան այն մասին, որ հնարավոր է Թրամփ-Ռոհանի հանդիպում Նյու Յորքում ՄԱԿ Գլխավոր ասամբլեայի շրջանակում: Հնարավոր է, որ Բոլթոնի հրաժարականը բերի ամերիկա-իրանյան լարվածության թուլացման, ինչ ուղերձ է պարունակում Բոլթոնի հեռացումը: Այս և հայ-իրանական օրակարգին վերաբերող մի շարք հարցեր «Առաջին լրատվական»-ը քննարկել է Իրանի Իսլամական Հանրապետության Մեջլիսի նախկին պատգամավոր Ռոբերտ Բեգլարյանի հետ:
Բեգլարյանը շեշտեց, որ «Բոլթոնի պաշտոնանկությունից անմիջապես հետո պարոն Մնուչին (ԱՄՆ ֆինանսների նախարար Սթիվեն Մնուչի-խմբ.) և Պոմպեոն (պետքարտուղար Մայք Պոմպեո-խմբ.) հայտարարեցին Իրանի դեմ ավելի խիստ տնտեսական պատժամիջոցների մասին» :
Անդրադառնալով մամուլի հրապարակումներին այն մասին, որ առաջիկայում հնարավոր է Թրամփ-Ռոհանի հանդիպում Նյու Յորքում ՄԱԿ Գլխավոր ասամբլեայի շրջանակում, մեր զրուցակիցն ասաց. «Ես անձամբ այդքան լավատես չեմ այն առումով, որ հանդիպումը տեղի կունենա, քանի որ Իրանը հայտարարել է՝ հանդիպումներ տեղի չեն ունենա այնքան ժամանակ, քանի դեռ Միացյալ Նահանգները չի չեղարկել պատժամիջոցները: Ինձ թվում է՝ այս ամենը հարաբերությունները, այսպես ասած, սառեցնելու, դրանք նույն մակարդակին պահելու փորձ է»:
Անդրադառնալով հայ-իրանական հարաբերություններին և այն փաստին, որ երկկողմ նախագծերի մեծ մասը կյանքի չի կոչվում և մնում է թղթի վրա, Բեգլարյանն ասաց. «Ելնելով իմ անձնական փորձից և այն շփումներից, որ ունեցել եմ՝ դժբախտաբար, լավատես չեմ, թղթի վրա շատ բաներ կան, ամենացայտուն օրինակը Արաքսի ՀԷԿ-ի օրինակն է, երկուստեք հանդիպումների ժամանակ բազմիցս խոսվել է շինարարական աշխատանքները զարկ տալու մասին, բայց մինչ օրս անիվը տեղից չի շարժվել»:
Բեգլարյանի կարծիքով՝ թե՛ Իրանը, թե՛ Հայաստանը լրջությամբ չեն վերաբերվում համատեղ նախագծերին, պատճառները պետք է ուսումնասիրել և փորձել հեզասահ ձևեր գտնել իրավիճակից դուրս գալու համար:
Հարցազրույցն ամբողջությամբ՝ տեսանյութում:
