«Առաջին լրատվական»-ի տեղեկություններով՝ «Սեքյուրիթի դրիմ» ընկերությունում իրավապահների ստուգումները շարունակվում են, և նոր քրեական գործեր են հարուցվել:
Հիշեցնենք, որ «Սեքյուրիթի դրիմ» ընկերության համահիմնադիր Ալեքսան Զաքարյանն ու նույն անձին պատկանող «Էլիփս Ջի Էյ» ընկերության հաշվապահը արդեն իսկ մեկ այլ քրեական գործով ձերբակալվել, ապա կալանավորվել են: Քրեական գործը հարուցվել էր առանձնապես խոշոր չափերի յուրացում կատարելու դեպքի առթիվ, որի շրջանակում ամիսներ առաջ ընկերության նախկին տնօրեն Արամ Ղլեչյանը ցուցմունք էր տվել այն մասին, որ Ճանապարհային ոստիկանությունից ամսական ստացված 70 միլիոն դրամից 43 միլիոն դրամը յուրացվել է ընկերության հիմնադիրների կողմից:
Մեզ հասած տեղեկություններով՝ նոր քրեական գործն արդեն վերաբերում է ընկերության տնօրեն Արթուր Պողոսյանին ու վարչության պետ Արսեն Ղազարյանին: Վերջիններիս մեղադրանք է առաջադրվելու փաստաթղթեր կեղծելու և օգտագործելու համար: Մասնավորապես, սեպտեմբերի 6-ին «Սեքյուրիթի դրիմ» ընկերության երկու նախկին աշխատող հաղորդում են ներկայացրել ոստիկանությանը, որի քննությունից պարզ է դարձել, որ «Սեքյուրիթի դրիմ» ընկերության վարչակազմի ղեկավար անձինք 2019-ի մարտ ամսին պատրաստել են իրավունք վերապահող և պաշտոնեական փաստաթուղթ հանդիսացող մի փաստաթուղթ, որտեղ նշել են ընկերության 15 աշխատողների աշխատանքից բացակայելու վերաբերյալ իրականությանը չհամապատասխանող, կեղծ զեկուցագիր, որի հիման վրա էլ նշված 15 աշխատողները մարտի 26-ին ազատվել են աշխատանքից: Ոստիկանությունը բավարար է համարել առկա փաստերը քրեական գործ հարուցելու համար: Նախապատրաստվող նյութերում առկա են Քրեական օրենսգրքի 325-րդ հոդվածի 2-րդ մասով նախատեսված հանցագործություն հատկանիշներ:
Հիշեցնենք, որ այս տարվա մարտ ամսին «Սեքյուրիթի դրիմ» ընկերության մի շարք աշխատողներ բողոքի ակցիաներ էին կազմակերպում իրենց ընկերության դիմաց: Ընկերության աշխատողները պահանջում էին աշխատանքից չազատել, հետ բերել տնօրեն Արամ Ղլեչյանին:
Հենց այդ ակցիաների ժամանակ էլ ընկերության ղեկավարությունը կազմել է 15-ից ավելի աշխատողների ազատման հրամանները՝ իբրև թե նրանք չեն եկել աշխատանքի: Ներկայումս, փաստորեն, պարզվել է, որ այդ հրամանները կեղծ են եղել:
Իսկ Արամ Ղլեչյանի հետ կապված խնդիրներն առաջացել էին այն բանից հետո, երբ ինքը հրաժարվել էր մասնակից դառնալ ընկերության հիմնադիրների կողմից իրականացվող հանցագործությանը։ «Հիմնադիրները՝ Գուրգեն և Ալեքսան Զաքարյանները, որոնք նաև «Էլիփս» ընկերության հիմնադիրներն են։ «Էլիփս» ընկերությունը ծառայություններ է մատուցում «Սեքյուրիթի դրիմ» ընկերությանը, բայց փաստացի «Էլիփս» ընկերությունը չի մատուցում այն ծավալով ծառայություններ, որոնք արտացոլված են ընդունման հանձնման ակտերում։
