Այսօր՝ սեպտեմբերի 10-ին, Ազգային ժողովի հայտարարությունների ժամին «Իմ քայլը» խմբակցության պատգամավոր Թագուհի Թովմասյանը իր ելույթը վերնագրեց՝ «Արդեն ժամանակն է մերժել խաբեբաներին»:
Նա անդրադարձավ Տիգրան Սարգսյանի վարչապետության շրջանում Սևանա լճի ձկնատեսակների և էկոհամակարգի վերականգնմանն ուղղված ծրագրին. «Նպատակն էր վերականգնել Սևանա լճում Իշխանի պաշարները, ֆինանսական միջոցներ ստեղծել Սևանա լճի բնապահպանական խնդիրների լուծման համար: Մեկ տարի անց՝ 2014 թվականին ստեղծվեց «Սևանի իշխան» ընկերությունը: 2015 թվականին, երբ վարչապետը Հովիկ Աբրահամյանն էր, ստեղծվեց «Սևան ակվա» ընկերությունը»:
Նրա խոսքով՝ Սերժ Սարգսյանի իշխանությունը ամենաբարձր մակարդակով հովանավորում էր ստեղծված ընկերությունները. «Հիմնադրման օրվանից ՀՀ կառավարությունը այս ընկերություններին տրամադրել է հարկային արտոնություններ, ընդհանուր առմամբ պետբյուջեի միջոցներից հատկացրել մոտ 11 մլրդ դրամ»:
Պատգամավորը նշեց, որ այդ ընկերությունը 2000 աշխատատեղի փոխարեն այս տարիների ընթացքում ստեղծել է ընդամենը 10-12 աշխատատեղ. «Թերևս ժամանակն է, որ ՀՀ կառավարությունը խստագույնս զբաղվի այս ընկերությամբ, հողատարածքները վերադարձնի իրենց իրական տերերին և նրանց պատժի ենթարկի պետությանը խաբելու համար»:
Մանրամասները՝ տեսանյութում: