Լուրեր
Ուղիներ կան նաև խորհրդարանից դուրս. Որպես անկախ պատգամավոր անելու եմ առավելագույնը. Արման Բաբաջանյան
  • 16:59
  • 2019-09-10
  • Դիտումներ՝ *

Այսօր՝ սեպտեմբերի 10-ին, ԱԺ հայտարարությունների ժամին պատգամավոր Արման Բաբաջանյանը հիշեցրեց, որ մի քանի օր առաջ ինքը կայացրել է դժվարին որոշում և հայտարարել է «Լուսավոր Հայաստան» խմբակցությունից դուրս գալու մասին: «Այդ թիմի հետ ես անցել եմ դժվարին ճանապարհ, հաղթահարել եմ բազմաթիվ մարտահրավերներ»:

Նրա խոսքով՝ իր որոշման պատճառը ոչ միայն և ոչ այնքան կապված է «Լուսավոր Հայաստան» խմբակցության, որքան ընդհանուր քաղաքական համակարգի և այդ համակարգի ախտերի հետ:

«Ես համոզված եմ, որ նոր Հայաստանը կարիք ունի միանգամայն նոր քաղաքական համակարգի, նոր քաղաքական գաղափարների ու սկզբունքների, նոր քաղաքական մտքի և ընդհանուր առմամբ՝ նոր քաղաքականության: Ցավոք, ես այդ նոր քաղաքականությունը չեմ տեսել և չեմ տեսնում ո՛չ «Լուսավոր Հայաստանում», ո՛չ մնացած՝ հատկապես խորհրդարանական ուժերում»,- նշեց պատգամավորը:

Արման Բաբաջանյանը ցավով արձանագրեց. «Ախտահարված քաղաքական համակարգի արտահայտություններն առկա են ինչպես ինձնից աջ և ձախ, այնպես էլ կենտրոնում գտնվող պատգամավորական խմբակցություններում: Հենց այդ ախտահարման հետևանքն է այն, որ մենք հեղափոխությունից 1,5 տարի հետո ունենք այնպիսի չլուծված ճգնաժամային իրավիճակներ, ինչպիսին ունենք ՍԴ-ում, այնպիսի կնճռոտ ճգնաժամ, ինչպիսին ունենք Ամուլսարի հետ կապված խնդրում, ինչպիսիք են անցումային արդարադատության հետ կապված խնդիրները և այլն»:

Նրա կարծիքով՝ խորհրդարանը համարժեք չէ պետության և հասարակության առջև ծառացած մարտահրավերներին ու խնդիրներին. «Այդ անհամարժեքության համախտանիշը վերաբերում է ոչ միայն ներքին կյանքին, այլև արտաքին քաղաքականությանը: Հեղափոխությունից հետո մենք տեսնում ենք ՀՀ-ի կողմից վարվող անատամ, իներտ արտաքին քաղաքականություն, որը որևէ աղերս չունի հեղափոխության հիմքում ընկած գաղափարների հետ, և որը վարում էր նախորդ ավտորիտար իշխանությունը»:

Մինչդեռ ժողովրդավարացված Հայաստանը պետք է աշխարհի հետ հարաբերվեր ու խոսեր այլ, միանգամայն նոր լեզվով, նոր օրակարգերով՝ ընդգծեց նա: «Մեր այս հավաքական անհամարժեքությունը իրողություն է, որից պետք է ոչ թե փախչել, այլ դուրս գալու, հաղթահարելու ուղիներ գտնել: Այդ ուղիները կան ինչպես այստեղ՝ խորհրդարանում, այնպես էլ խորհրդարանից դուրս: Կան բազմաթիվ առողջ ու մտահոգ անհատներ ու միավորներ, որոնք պատրաստ են ամեն ինչ անել հանուն այդ վերափոխումների շարունակականության ու վերջնական հաղթանակի»:

Արման Բաբաջանյանը շեշտեց, որ այսուհետ անկախ պատգամավորի կարգավիճակում անելու է առավելագույնը այդ սուրբ նպատակը իրականացնելու նպատակով անհրաժեշտ ուժերին ու անհատներին համախմբելու, միավորելու ու նրանց ներուժը ի բարօրություն Հայաստանի, Հայաստանի պետականության ու  հայ ժողովրդին ծառայեցնելու համար. «Աստված բոլորիս պահապան»:

 

Մանրամասները՝ տեսանյութում:

  • Դիտումներ՝ *