Այսօր՝ սեպտեմբերի 10-ին, Ազգային ժողովը շարունակում է աշխատանքները:
ԱԺ արտաքին հարցերի հանձնաժողովի նախագահ Ռուբեն Ռուբինյանը որոշեց պատասխանել Արման Բաբաջանյանի ելույթին. «Չեմ ուզում անդրադառնալ ձեր կոնկրետ հարցադրումներին, բայց ուզում եմ անդրադառնալ ձեր հարցադրումների և ելույթի ոգուն»:
Նա կատարեց մի քանի արձանագրումներ. «Առաջին՝ Ռուսաստանը Հայաստանի դաշնակիցն է՝ դրանից բխող պարտավորություններով, և այն հիմնված է կողմերի հավասարության և փոխգործակցության վրա: Երկրորդ՝ աշխարհում չկան պետություններ, որոնք չեն կարող խնդիրներ չունենալ միմյանց միջև»:
Նրա խոսքով՝ թավշյա հեղափոխությունից հետո ՀՀ-ն խնդիրներ չի ունեցել բազմապիսի միջազգային գործընկերների հետ. «Ելնելով Ձեր տրամաբանությունից՝ Ձեզ մնում է հայտարարել, որ ՀՀ ինքնիշխանությանը ոտնձգություն կամ սպառնալիք կա»:
Ռուբեն Ռուբինյանը, ներկայացնելով իրենց տրամաբանությունը, նշեց. «Երբ մենք խնդիր ենք տեսնում, դրանք բարձրաձայնում ենք երկու կերպ՝ կա՛մ հրապարակային հայտարարություններով, ինչը Դուք հաստատապես տեսել եք վերջին առնվազն 1,5 տարվա ընթացքում, կա՛մ այլ աշխատանքային ֆորմատների միջոցով, ինչի մասին Դուք կարող էիք և տեղյակ լինել մեր հանձնաժողովի նիստերի ընթացքում»:
Նա Արման Բաբաջանյանին հիշեցրեց, որ իր առջև կանգնած են ինքնիշխան Հայաստանի լեգիտիմ իշխանությունները և ոչ՝ նախկին իշխանությունները. «Ես Ձեզ հորդորում եմ այլևս նման լեզու չկիրառել մեր հանդեպ, որովհետև ՀՀ իշխանությունները բազմիցս ապացուցել են, որ չունեն ոչ մի կաշկանդվածություն բարձրաձայնելու մեր շահերից բխող հարցերը, և միշտ լինելու է այդպես: Խնդրում եմ այսուհետ չխառնել սա»:
Մանրամասները՝ տեսանյութում: