Այսօր՝ սեպտեմբերի 10-ին, Ազգային ժողովը շարունակում է աշխատանքները:
Ի պատասխան Ռուբեն Ռուբինյանի ելույթի՝ Արման Բաբաջանյանը որոշեց հիշեցնել, թե ինչպես է ոտնձգություն կատարվում ՀՀ ինքնիշխանության նկատմամբ. «Երբ Հայաստանում սահմանադրական կարգը տապալելու ծանրագույն ոճրագործության մեջ մեղադրվող անձին ՌԴ նախագահը շնորհավորական ուղերձ է հղում՝ սա սպառնալի՞ք է արդյոք մեր ինքնիշխանությանը, թե՞ ոչ: Երբ Ռուսաստանի իրավական համակարգը Հայաստանում հետախուզվող նախկին բարձրաստիճան պաշտոնյայի նկատմամբ որոշակի վարք է դրսևորում՝ սա ոտնձգությո՞ւն է մեր ինքնիշխանությանը, թե՞ ոչ: Օրերս ՌԴ գլխավոր դատախազության որոշումը Մարտի 1-ի գործով մեղադրյալ, պաշտպանության նախկին նախարար Միքայել Հարությունյանի վերաբերյալ՝ սա ոտնձգությո՞ւն է մեր ինքնիշխանության նկատմամբ, թե՞ ոչ: Երբ ՍԴ նախագահի հետ հանդիպում է մեր երկրում ՌԴ դեսպանը, և մենք այդ հանդիպման բովանդակության մասին չգիտենք՝ ի՞նչ կարգ է գործում այստեղ»:
Նրա խոսքով՝ երբ ՌԴ պրոպագանդիստական որջ համարվող «Սպուտնիկ» լրատվական գործակալությունը, որը նախկին թալանչի վարչապետներից մեկի տարածքում Երևանի կենտրոնում ձրի տեղավորվել է, արդեն իր ֆեյսբուքյան էջերում թիրախավորել է Հայաստանի սփյուռքյան համայնքները և արատավորում ու անվստահություն է ձևավորում ՀՀ իշխանությունների նկատմամբ՝ դա ոտնձգությո՞ւն է մեր ինքնիշխանության նկատմամբ, թե՞ ոչ. «Եվ դուք այս բոլոր իրավիճակներում ծպտուն չեք հանել, որովհետև խիզախություն ու համարձակություն չունեք այս հարցերի մասին խոսելու: Ես այսուհետ ունեմ ու կխոսեմ»:
Մանրամասները՝ տեսանյութում:
