Լուրեր
Մենք շարունակում ենք սպասարկել ՀԱՊԿ-ի շահերը, որպեսզի Ռուսաստանը հանկարծ մեզ չպատժի. Արման Բաբաջանյան
  • 11:54
  • 2019-09-10
  • Դիտումներ՝ *

Այսօր՝ սեպտեմբերի 10-ին, Ազգային ժողովը շարունակում է աշխատանքները:

Այժմ քննարկվում է 2002թ. հոկտեմբերի 7-ի ՀԱՊԿ իրավական կարգավիճակի մասին փոփոխություն կատարելու մասին օրենքի նախագիծը:

Հիշեցնելով, որ Ադրբեջանի Միլի մեջլիսի իրավական հարցերով հանձնաժողովի նախագահ Հուսեյնովը իր հարցազրույցներից մեկում ասել է, որ ժամանակն է և պետք է դիտարկել ՀԱՊԿ-ին Ադրբեջանի անդամակցության հարցը՝ պատգամավոր Արման Բաբաջանյանը հայտարարեց. «ՀԱՊԿ-ում մեր հակառակորդը, չլինելով այդ կազմակերպության անդամ, ավելի ծանրակշիռ ներկայություն ունի, քան Հայաստանը՝ կազմակերպության լիիրավ անդամ լինելով: Այդ ներկայությունը Ադրբեջանի համար ապահովում են ՀԱՊԿ անդամ Բելառուսը և Ղազախստանը: ՀԱՊԿ-ում մեր միակ դաշնակիցը առայժմ միայն Ռուսաստանն է»:

Նրա խոսքով՝ պետք է աշխատանք տանել Տաջիկստանի և Ղրղըզստանի ուղղությամբ՝ դաշնակցային հարաբերությունների համար:

Գալով Ռուսաստանին՝ պատգամավորն ասաց. «Մենք Ռուսաստանին տալիս ենք ամեն ինչ՝ փոխարենը ստանալով ոչինչ: Այս պայմաններում ՀԱՊԿ-ի հետ որևէ գործողություն կամ գործունեություն ընդամենը խորացնում է Հայաստանի արժանապատվության և ինքնիշխանության հաշվին Ռուսաստանին սպասարկողի մեր վիճակը»:

Արման Բաբաջանյանը ընդգծեց, որ դեսպանների հետ հանդիպմանը վարչապետի և ԱԳ նախարարի ելույթները ինքնիշխանության սկզբունքի մասին ընդամենը գեղեցիկ ելույթներ էին՝ իրականության հետ աղերս չունեցող. «ՀԱՊԿ-ի հետ վարվող մեր քաղաքականությունը որևէ աղերս չունի ինքնիշխանության և անկախության հետ: Մենք շարունակում ենք մնալ ՀԱՊԿ-ում և սպասարկել այդ կառույցի շահերը միայն նրա համար, որ Ռուսաստանը մեզ հանկարծ չպատժի»:

 

Մանրամասները՝ տեսանյութում:

  • Դիտումներ՝ *