Մեր սիրտը «չի սիրում» երկուշաբթի օրերը, կեսօրը, արձակուրդի առաջին և վերջին օրերը, ինչպես նաև բարձր ջերմաստիճանները: Նման եզրակացության են եկել լեհ գիտնականները. նրանք պարզել են, թե ինչպես է աճում սրտի կաթվածի ռիսկը՝ կախված շրջապատող պայմաններից: Բժիշկների եզրակացությունները հրապարակել է ՏԱՍՍ-ը:
Երկուշաբթի օրվա վտանգավորության մասին վկայում է այն փաստը, որ սրտի կաթվածների 17 %-ը տեղի է ունենում հենց առաջին աշխատանքային օրը: Մյուս օրերին՝ երեքշաբթիից ուրբաթ, տեղի են ունենում նման դեպքերի մոտ 15 %-ը: Իսկ հանգստյան օրերին՝ միայն 11-12 %-ը: Դրա պատճառն այն է, որ աշխատավայրում սթրեսը մեծացնում է նոպայի ռիսկը:
Սրտի համար ռիսկի բարձրացման երկրորդ ժամանակահատվածը կեսօրն է: Լեհ սրտաբանների վերլուծությունը ցույց է տվել, որ առավոտյան ժամը 6: 00-ից 12: 00-ն ընկնում է սրտի կաթվածների 27 %-ը, իսկ կեսօրից մինչև 18:00-ն ընկած ժամանակահատվածում՝ 35 %-ը: Երեկոյան տեղի են ունենում նոպաների 22 %-ը, իսկ գիշերն՝ ամենաապահով ժամանակն է:
Վտանգավոր են համարվում նաև արձակուրդի առաջին և վերջին օրերը: Այդ ժամանակ սրտի կաթվածի ռիսկն ավելանում է մի քանի անգամ՝ կրկին սթրեսի, կլիմայի և ժամային գոտու փոփոխություն, երկար ճանապարհի, ֆիզիկական և հուզական լարվածության պատճառով:
Եվս մեկ գործոն է շոգը: +20-ից հետո սրտի կաթվածի ռիսկը երկրաչափական պրոգրեսիայով աճում է յուրաքանչյուր աստիճանի հետ: Միևնույն ժամանակ, ջերմաստիճանի կտրուկ տատանումները նույնպես վնասակար են:
