Վարչապետ Նիկոլ Փաշինյանը ջերմուկցիներին և հարակից բնակավայրերի բնակիչներին կոչ է արել ապաշրջափակել Ամուլսարի հանքի ճանապարհները: Վարչապետը անդրադարձել է Ամուլսարի խնդրին և ազդարարել, որ բնապահպանական ռիսկերը կառավարելի են, ըստ այդմ Հայաստանը չի կարող միարժեք պնդել հանքի չշահագործման հարցը, քանի որ դա կբերի երկրի միջազգային վարկի հետ կապված խնդիրների և դրանից բխող տնտեսական հետևանքի: Փաշինյանը հայտարարել է, որ միաժամանակ բնապահպանական տեսչությանն է հանձնարարել ստուգումներ սկսել Ամուլսարում, վերահսկելու համար տեղի ունեցող գործընթացը:
Թեմայի շուրջ «Առաջին լրատվականի» հետ քննարկմանը մասնակցեցին «Քաղաքացու որոշում» կուսակցության գործադիր մարմնի անդամ Գարեգին Միսկարյանը, իրավապաշտպան Զարուհի Հովհաննիսյանը, բնապահպան, լրագրող, Գնդեվազի բնակիչ Թեհմինե Ենոքյանը:
Հիշեցնենք՝ նախորդ շաբաթ վարչապետը հանդիպումներ ունեցավ թե՛ ջերմուկցիների, թե՛ «Իմ քայլը» խմբակցության և թե՛ նաև «Լիդիան Արմենիա» ընկերության ղեկավարության հետ:
Գարեգին Միսկարյանը նշեց, որ դժվար է գնահատական հնչեցնել «կուլիսներում» տեղի ունեցածի վերաբերյալ. «Բայց այն, որ վարչապետի որոշումն ամբողջությամբ հակասում է ELARD-ի հետ տեսակոնֆերանսի տրամաբնությանը, դա միանշանակ է: Նիկոլ Փաշինյանն ասում է, որ իրավական հիմքեր չկան, որ հանքի շահագործումը դադարեցվի, սակայն դա, մեղմ ասած, սուտ է, քանի որ առնվազն 6 իրավական հիմք կա»:
Ժողովրդավարական պետությունում պետք է հաշվի առնել բնակչության կարծիքը. բնակչությունը դեմ է Ամուլսարի շահագործմանը,-նշեց Զարուհի Հովհաննիսյանը՝ հավելելով, որ Ամուլսարի վերաբերյալ որոշումը ժողովրդավարական ճանապարհով չի կայացվում. քննարկումներին չեն մասնակցել բնապահպաններ, մասնագիտական խմբեր:
Թեհմինե Ենոքյանն ընդգծեց, որ վարչապետի հայտարարություններում շատ հակասական կետեր կան: Նա նաև հավելեց, որ հայտարարվում է, որ «Լիդիանը» ոչ մի օրենք չի խախտել, և չպետք է նրա ՇՄԱԳ-ը ուժը կորցրած ճանաչել, բայց փաստ է, որ 2018թ. մայիսին տեղի ունեցած գործողությունների, պայթեցումների հետևանքով աղտոտվել է խմելու ջուրը. «Երեք անգամ վնասվել են Գնդեվազի խմելու ջրի ջրատարերը; Միայն այն, որ տեսչությունը ստուգել է և խմելու ջրի աղտոտման փաստն արձանագրված է, բավարար էր, որ «Լիդիանին» լիցենզիայից զրկեին»:
Մանրամասն՝ տեսանյութում:
