Կարո՞ղ ենք փաստել, որ Ամուլսարի հարցն արդեն մոտենում է հանգուցալուծման, և ուրվագծվո՞ւմ է արդյոք, որ Գործադիրը կանաչ լույս է վառում «Լիդիանի համար»: Թեմայի շուրջ «Առաջին լրատվական»-ի հետ քննարկմանն այս և մի շարք այլ հարցերի անդրադարձան բնապահպանական ակտիվիստներ Աննա Շահնազարյանը և Ապրես Զոհրաբյանը:
Հիշեցնենք՝ վարչապետ Նիկոլ Փաշինյանը ջերմուկցիներին և հարակից բնակավայրերի բնակիչներին կոչ է արել ապաշրջափակել Ամուլսարի հանքի ճանապարհները: Վարչապետը անդրադարձել է Ամուլսարի խնդրին և ազդարարել, որ բնապահպանական ռիսկերը կառավարելի են, ըստ այդմ Հայաստանը չի կարող միարժեք պնդել հանքի չշահագործման հարցը, քանի որ դա կբերի երկրի միջազգային վարկի հետ կապված խնդիրների և դրանից բխող տնտեսական հետևանքի: Փաշինյանը հայտարարել է, որ միաժամանակ բնապահպանական տեսչությանն է հանձնարարել ստուգումներ սկսել Ամուլսարում, վերահսկելու համար տեղի ունեցող գործընթացը:
«Ուրվագծվում է կանաչ լույս վառելու փաստը, բայց դա այս հարցը հանգուցալուծման չի տանում, այլ ընդհակառակը՝ խորացնում և ստեղծում է սարսափելի ճգնաժամ,- ընգծեց Աննա Շահնազարյանը: -Վարչապետը տեսչական մարմնին հանձնարարել է ստուգումներ անել. տեսչական մարմինն արդեն նման բան արել է, և գոյություն ունի տեսչական մարմնի ընունած որոշում, վարչական ակտ, որը մինչ օրս ուժի մեջ է, այդ վարչական ակտով արդեն իսկ արգելված է Ամուլսարում հանքարդյունաբերություն իրականացնելը: Ինչպես նաև դեռևս 2018թ. դրությամբ, ստուգման արդյունքներում հայտնաբերված փաստերի հիմքով բնապահպանության նախարարությանը ներկայացված է գրություն, որտեղ պահանջվում է, որ նախարարությունը ՇՄԱԳ-ը ուժը կորցրած ճանաչի: Փաստացի նոր տեսչական գործունեություն իրականացնելու իրավական հիմք չկա: Ես և բազմաթիվ մարդիկ պնդում ենք, որ այս դրվագով, ինչպես նաև իր հայտարարության մի քանի այլ դրվագներով, Փաշինյանը դուրս է եկել իր լիազորություններից և հակաիրավական հայտարարություններ է անում…»:
Ապրես Զոհրաբյանն ընդգծեց, որ իր կարծիքով՝ նախօրոք եղել է քաղաքական որոշում հանքը շահագործելու վերաբերյալ. «Իսկ միջազգային փորձաքննությունը և մյուս գործողությունները ծխածածկույթ էին, որ հանրությանը ցույց տային, թե ամեն ինչ նորմալ է: Ի սկզբանե սցենարն այսպիսին է գծված եղել նրանց կողմից, բայց այն չաշխատեց, որովհետև հստակ երևաց, որ միջազգային փորձագիտական խումբը միանշանակ դրական եզրակացություն չէր տալիս, շատ կասկածներ մնում են: Փորձ արվեց դա ծածկադմփոց անել… Թերագնահատել էին հանրային դիմադրությունն այս հարցի շուրջ: Իսկ հանրային դիմադրությունը եղավ բավական լայն և բազմաշերտ»: Ա. Զոհրաբյանը նաև ընդգծեց, որ Փաշինյանն այս քայլին գնալով՝ ակնհայտորեն նվազեցնում է իր վարկանիշը:
Մանրամասն՝ տեսանյութում:
