Անհայտ ինքնաթիռը հարվածել է իրանական կազմավորումների և նրանց կողմնակիցների դիրքերին Սիրիայի և Իրաքի սահմանին: Այս մասին հաղորդում է «Al-Hadath» հեռուստաալիքը՝ հղում անելով Մարդու իրավունքների մոնիտորինգի սիրիական կենտրոնին:
Ըստ հեռուստաալիքի, սեպտեմբերի 9-ին, կեսգիշերից անմիջապես հետո, հարձակման են ենթարկվել շիական աշխարհազորայինների դիրքերը Աբու Քեմալ քաղաքի մոտակայքում: Հաղորդվում է, որ արդյունքում 18 զինյալ է զոհվել, նրանց ազգությունը դեռևս ճշտված չէ:
Աղբյուրները պատմել են երեք պայթյունների մասին: Ըստ որոշ տեղեկությունների, տուժել են իրանական ուժերի կողմից օգտագործվող զենքի պահեստները:
Al-Hadath-ը նշում է, որ վերջին ամիսներին իրանական կազմավորումները ուժեղացրել են իրենց ներկայությունը սիրիա-իրաքյան սահմանին:
Սիրիայում իրանական ուժերը օգնում են կառավարական զորքերին հակառակորդների դեմ պայքարում: Իսրայելը և ԱՄՆ-ն ակտիվորեն պահանջում են այդ ուժերի հեռանալը երկրից:
Սիրիայում քաղաքացիական պատերազմը սկսվել է 2011-ի գարնանը: Հակամարտության հիմնական մասնակիցները կառավարական ուժերն են, որոնք աջակցում են գործող նախագահ Բաշար Ասադին, այսպես կոչված, չափավոր ընդդիմությունը և իսլամական խմբավորումները: Ընդդիմությանն աջակցում են Միացյալ Նահանգները և եվրոպական երկրները, Ռուսաստանը օգնում է Բաշար Ասադի կառավարությանը: