Այս տարի Լոս Անջելեսում սեպտեմբերի 22-ին սպասվում է մեծ հանդիպում վարչապետ Ն.Փաշինյանի և տեղի հայ համայնքի հետ: «Լոս Անջելեսում հայության շրջանում տիրում է այնպիսի տրամադրություն, ինպիսին Հայաստանում թավշյա հեղափոխության օրերին էր. ժողովուրդը մեծ ոգևորությամբ սպասում է այդ օրվան,- «Առաջին լրատվական»-ի հետ զրույցում վստահեցրեց երգիչ, ՀՀ վաստակավոր արտիստ Հարութ Փամբուկչյանը՝ Ձախ Հարութը:- Հայասեր սենատորներ կան, որոնք հայկական միջոցառումներին միշտ ներկա են լինում, վարչապետի հանդիպմանը, վստահ եմ, նրանք նույնպես ներկա կլինեն, ինչպես նաև ամերիկացի քաղաքական այլ դեմքեր:
Խոսելով մշակութի նախարարության՝ կրթության և գիտության նախարարության հետ միավորման մասին՝ երգիչը նշեց. «Մենք մշակույթի նախարարության կարիք ունենք: Մենք մի ժողովուրդ ենք, որն այնքան կապված է մշակույթի հետ, մեր մշակույթի գործերը դարերով գալիս են, ինչպես կարելի է անտեսել մշակույթը և ասել՝ մեզ պետք չէ մշակույթի նախարարություն… Մշակույթը պետք է կարևորել»:
«Չկա Սփյուռք առանց հայրենիքի: Մենք ատամներով կառչել ենք մեր մշակույթին»,- նշեց Հ. Փամբուկչյանը՝ ընդգծելով, որ Սփյուռքը պահում են հայկական դպրոցներն ու եկեղեցին: «Սփյուռքի փրկությունը Հայաստանն է: Ուրիշ երկրում կարող ես հարուստ ապրել, բայց քո երկիրը չէ: Միայն Հայաստան աշխարհն է մերը,- ընդգծեց երգիչը՝ վստահեցնելով. «Որոշել եմ՝ Հայաստանում տուն եմ առնելու: Ես գիտեմ՝ մի օր ես էլ եմ գալու, իմ տղան էլ է գալու Հայաստան»:
Մանրամասն՝ տեսանյութում: