Ռուսաստանի քրեական աշխարհի առաջնորդ Զախարի Քալաշովը, որը քրեական շրջանակներում հայտնի է որպես Շակրո Մոլոդոյ, անհաջողության է մատնվել՝ փորձելով օրենքով գողերին տրամադրել Ադրբեջանի գլխավոր հեղինակություն Նադիր Սալիֆովի (Գուլի) դեմ, հաղորդում է «Prime Crime» գործակալությունը:
Որպես Սալիֆովի վրա ճնշում գործադրելու պատրվակ Քալաշովը փորձել է օգտագործել Թուրքիայում օգոստոսի 26-ին տեղի ունեցած միջադեպը: Այդ ժամանակ 35-ամյա ժառանգական օրենքով գող Գուրամ Չիխլաձեին (Կվեժովիչ) Սալիֆովի հետ հանդիպման ժամանակ ծեծի է ենթարկել Ադրբեջանի գլխավոր հեղինակության մերձավոր Արման Ջումագելդիևը (Վայրի Արման):
Ջումագելդիևին թվացել է, որ Չիխլաձեն իրեն շատ հանդուգն է պահում Սալիֆովի առաջ: Շատ չանցած, մոսկովյան օրենքով գող Բադրի Կոգուաշվիլին (Քութաիսսկի) հայտարարել է, որ Սալիֆովը, որը թույլ էր տվել Չիխլաձեին ծեծի ենթարկել, օրենքով գող չէ և պետք է զրկվի այդ կոչումից:
Կոգուաշվիլիին աջակցել է նաև Զախարի Քալաշովը, որը նշել է, որ Թուրքիայում տեղի ունեցածն ապտակ է իր համար:
Այնուամենայնիվ, Քալաշովի կողմից օրենքով գողերին Սալիֆովի դեմ տրամադրելու փորձը հակառակ արդյունք է տվել: Վերջինիս հեղինակությունը գողական աշխարհում միայն մեծացել է, և այսօր Սալիֆովը շատ մոտ է Մերաբ Ջանգվելաձեի (Սուխումսկի) ազդեցիկ գողական կլանի հետ դաշինք կնքելուն: Նրանց դաշինքը իրականում կնշանակի օրենքով գողերի աշխարհի միավորում և Քալաշովի լիակատար պարտություն:
Միևնույն ժամանակ, Ջանգվելաձեն Քալաշովի հետ հեռախոսազրույցում արդեն հայտարարել է, որ Սալիֆովին համարում է իր եղբայրը, և որ հոգնել է Քալաշովի խաղերից: Ջանգվելաձեն նաև նշել է, որ «Քալաշովի 90-ականներից եկած հնարքները, երբ նա տրամադրում էր մեկին մյուսի դեմ, ոմանց մի բան ասելով, մյուսներին՝ մեկ այլ, բարոյապես հնացած են»:
