«Վստահ եմ՝ ուռուցքաբանության ոլորտում օրեր անց ամեն ինչ կկարգավորվի: Ուռուցքաբանության ազգային կենտրոնը շատ լավ կոլեկտիվ ունի, պրոֆեսիոնալ, ինչ-ինչ խմորումներ կարող են լինել, բայց օրերի ընթացքում կհարթվեն: Փոփոխությունները հիմնավորված են ու բերելու են և՛ ոլորտի զարգացմանը, և՛ աշխատակիցների կյանքի որակի բարելավմանը»,- այս մասին առողջապահության ոլորտի ձեռքբերումների և առկա խնդիրների շուրջ «Առաջին լրատվական»-ի հետ զրույցում ասաց Ուռուցքաբանության ազգային ինստիտուտի ուռուցքաբանության ամբիոնի վարիչ Վահե Տեր-Մինասյանը:
Առողջապահության նախարարության Ազգային ինստիտուտի գլխավոր խորհրդական Դավիթ Պետրոսյանը նշեց, որ ցավ է ապրում և հիմքեր չի տեսնում առողջապահության ոլորտում տեղի ունեցող իրադարձությունների համար: Անդրադառնալով առողջապահության նախախար Արսեն Թորոսյանի մամուլի ասուլիսի տապալմանը՝ առողջապահության նախարարության պաշտոնաթող խորհրդատու Գևորգ Թամամյանի նախաձեռնությամբ, Դ. Պետրոսյանը նշեց. «Հատուկ սպասելը, որ լրագրողները հավաքվեն, հետո այդպիսի ագրեսիվ ձևով հարցեր ուղղելը և նախարարի անցնելու ժամանակ նրա ուսին խփելը իմ գիտակցության մեջ չի տեղավորվում: Բժիշկներն այդպիսի վարքագիծ չեն ցուցաբերում: Այն էլ մանկական ուռուցքաբանն ինչքան պետք է բարի լինի…:
Լրագրողներից շատերը «շիրա են տալիս» նման պահերին, սկանդալ կլիներ, ինչո՞ւ Արսեն Թորոսյանը հայտնվեր ավելի մեծ սկանդալի մեջ: Ես համարում եմ, որ նա ճիշտ վարվեց, որ հեռացավ: Նա վախկոտ տղա չէ, ուղղակի չցանկացավ որ ամեն ինչ բարդանա»:
«Պետական գործիչը և տղայական խոսակցությունը տարբեր հասկացություններ են,- հավելեց Վ. Տեր-Մինասյանը: – Արսեն Թորոսյանը հասուն պետական գործիչ է և մեկ անգամ չէ, որ ապացուցել է: Եթե դեռ մեկ տարի առաջ նա չվախեցավ և քայլեր արեց բժշկական կոռումպացված համակարգի դեմ, ապա դժվար թե վախենար մեր գործընկերոջից՝ Գևորգ Թամամյանից: Ցավում եմ, որ Գ. Թամամյանը բժշկի իր բարի համբավը ոտքի տակ գցեց և բժշկի բարձր դիրքից իջավ»:
Մանրամասն՝ տեսանյութում:
