ԱՄՆ նախագահ Դոնալդ Թրամփն ուսումնասիրում է այլ երկրներին օգնության վերաբաշխման հնարավորությունը հօգուտ Վաշինգտոնի քաղաքականությունը սատարողների, իսկ երկրները, որոնք չեն սատարում Վաշինգտոնին, հնարավոր է ընդհանրապես զրկվեն միջոցների տրամադրումից։ Այս մասին ուրբաթ օրը հաղորդել է Politico թերթը, որի տրամադրության տակ է գտնվում համապատասխան նախագիծը։
Պատճառներից մեկը նոր դաշնակիցներ ձեռք բերելու ԱՄՆ ցանկությունն է՝ գեոքաղաքական ազդեցության համար Ռուսաստանի և Չինաստանի հետ աճող մրցակցության ֆոնին։ Այսպիսով, նշում է պարբերականը, կխախտվի հումանիտար և ոչ թե քաղաքական նկատառումներով օգնություն տրամադրելու սկզբունքը։
Մշակվող նախագծի համաձայն՝ Վաշինգտոնը կդադարի օգնել միջազգային հարթակում իր մոտեցումները չկիսող երկրներին։ Դա կարող է վերաբերել Ասիայի, Աֆրիկայի և Լատինական Ամերիկայի մի շարք երկրների։
Բացի այդ, այս ռազմավարությունը թույլ կտա ԱՄՆ–ին ոչ միայն խնայել, այլև «առաջնորդություն ապահովել գլոբալ էներգահամակարգում»։ Ընդ որում, «լոյալության» հստակ չափանիշները չեն նշվում, չնայած Թրամփն ու նրա շրջապատը բազմիցս նշել են, որ միջազգային կազմակերպություններում, առաջին հերթին ՄԱԿ–ում, որոշիչ գործոն է լինելու համերաշխ քվեարկությունը։ Politico-ն, սակայն, կոնկրետ տեղեկություններ չունի, թե երբ Սպիտակ տունը կհրապարակի նախաձեռնությունը և արդյոք կյանքի կկոչի այն թե ոչ։ ԱՄՆ վարչախումբը որևէ կերպ չի մեկնաբանել հոդվածը։
Թրամփն օգոստոսի 20–ին հայտարարել էր, որ ուսումնասիրում է այլ պետություններին տրամադրվող օգնության ծավալի հնարավոր կրճատման հարցը և շուտով կհրապարակի այս հարցի շուրջ իր որոշումը։