ԱՄՆ հիվանդությունների վերահսկման և կանխարգելման կենտրոններում (Centers for Disease Control and Prevention, CDC) ԱՄՆ տարածքում հինգ մարդու մահվան դեպք է գրանցվել, որոնք էլեկտրոնային ծխախոտ են ծխել։ Այս մասին տեղեկատվությունը սեպտեմբերի 6-ին զետեղվել է կենտրոնի կայքում։
Մահվան ելքով դեպքերը գրանցվել են Կալիֆորնիայի, Իլինոյսի, Ինդիանայի, Մինեսոտայի և Օրեգոնի նահանգներում։ Ընդհանուր առմամբ էլեկտրոնային ծխախոտ օգտագործելու պատճառով հիվանդության 450 դեպք է գրանցվել 33 նահանգներում և Ամերիկյան Վիրգինյան կղզիներում։
Լրագրողների տվյալների համաձայն, դեռ անցյալ շաբաթ դեպքերի ընդհանուր քանակը 215 է եղել՝ 25 նահանգներում։
Մասնագետները սկսել են հետազոտություններ անցկացնել՝ փորձելով կապ գտնել թոքային հիվանդությունների դեպքերի և էլեկտրոնային ծխախոտ ծխելու միջև։
Օգոստոսին առաջին մահվան դեպքն էր գրանցվել՝ ենթադրաբար էլեկտրոնային ծխախոտ ծխելու հետևանքով։
Սոցիոլոգների տվյալների համաձան՝ ծխող դեռահասների քանակությունը երկրում վերջին տարիների ընթացքում կրկնապատկվել է էլեկտրոնային ծխախոտի հասանելիության պատճառով։ Ավելի քան 1,5 միլիոն դեռահաս է նիկոտինային կախվածություն ձեռք բերել 2017-2018 թվականների ընթացքում։