Իրանի Իսլամական Հանրապետության նախագահ Հասան Ռոհանին հոկտեմբերի 1-ին Երևանում կմասնակցի ԵՏՄ վեհաժողովին: Հիշեցնենք, որ ավելի վաղ Հայաստանի վարչապետ Փաշինյանը հայտարարել էր, որ Ռոհանիին հրավիրել է Հայաստան՝ ԵՏՄ վեհաժողովին մասնակցելու: Թեմայի շուրջ «Առաջին լրատվական»-ը զրուցել է քաղաքագետ, ՄԱՀՀԻ փորձագետ Արմեն Վարդանյանի հետ:
«Հասան Ռոհանիի այցի հիմնական նպատակը Եվրասիական տնտեսական միությունն է, սա պաշտոնական այց չէ Հայաստան, բայց այցի կարևորությունն այն է, որ նախորդ տարվա մայիսին Իրանը և ԵՏՄ-ն կնքել են Ազատ առևտրի համաձայնագիր, որը շուտով ուժի մեջ է մտնելու, և այս համաձայնագիրը չափազանց մեծ նշանակություն ունի Հայաստանի համար»,- ասաց Վարդանյանը:
Մեր զրուցակիցը նշեց, որ Հայաստանը համաձայնագրի կնքման լոկոմոտիվներից մեկն էր, անընդհատ առաջ էր տանում այս գաղափարը: Բացի այդ, ազատ առևտրի համաձայնագրի գլխավոր շահառուներից Հայաստանն է լինելու, քանի որ ԵՏՄ միակ երկիրն է, որը ցամաքային սահման ունի Իրանի հետ: Չնայած այս հանգամանքին՝ բարձր մաքսատուրքերի պատճառով երկար տարիներ երկկողմ ապրանքաշրջանառության ծավալները չնչին են եղել, ուստի այս համաձայնագրի ստորագրումից հետո ակնկալվում է, որ ծավալները զգալիորեն կմեծանան՝ կարծում է Վարդանյանը:
Անդրադառնալով տարածաշրջանային վերջին զարգացումներին և այս համատեքստում Հայաստանի դիրքավորմանը՝ Վարդանյանը շեշտեց, որ մեր երկիրը պետք է պահպանի չեզոքություն, ինչպես պահել է մինչ այժմ: «Հանուն արդարության պետք է ասել, որ այս վերջին տարիներին՝ թե՛ Սերժ Սարգսյանի իշխանության օրոք, թե՛ ներկայիս իշխանությունները հավասարակշռված քաղաքականություն են վարում Իրանի հարցում: Բնականաբար, դա ձեռնտու է նաև Իրանին, վերջինիս պետք են կանխատեսելի հարևաններ, որոնք չեն միանա հակաիրանական արշավին: Պետք է ասել, որ Հայաստանն այս առումով ամենահուսալի, կանխատեսելի երկրներից է»:
Առավել մանրամասն՝ տեսանյութում:
