ԱԺ «Ժառանգություն» խմբակցության պատգամավոր Թևան Պողոսյանը, լրագրողների հետ հանդիպմանը անդրադառնալով Սիրիա կատարած իրենց ուղևորությանը, նշեց, որ պատգամավորների այցը Լաթաքիա ոչ թե պետական, այլ մասնավոր այց էր՝ ֆինանսավորել է Արման Սահակյանը: Նրա խոսքով՝ այցի նպատակը սեփական աչքերով տեսնել, փաստեր հավաքելն էր, հետո այդ ամենի հիմա վրա առաջարկությունների ցանկ մշակելը:
«Դժվար էր այդ մարդկանց հետ խոսել, նրանց պատմությունները լսել և չհուզվել»,- ասաց նա` հավելելով, որ, ցավոք սրտի, Քեսաբը դարձավ այն խնդիրը, որը մեզ միավորեց: Նրա համոզմամբ՝ երբ Քեսաբը ազատագրվի, մենք նույն կերպ պետք է համակարգված աջակցենք՝ պետք է այնպես անենք, որ Քեսաբն այլևս տարհանման պատմություն չունենա, Քեսաբը վերադառնա և մնա հայկական:
ԱԺ պատգամավոր Էդմոն Մարուքյանի խոսքով՝ հարձակումը եղել է անակնկալ, ոչ ոք չի սպասել, որ հարևան երկիրը սահմանը կբացի՝ զինյալներին թույլ տալով ներխուժել Քեսաբ:
Քեսաբահայերը տեղափոխվել են Լաթաքիա՝ Սուրբ Աստվածածին եկեղեցու տարածք, որտեղ 320 ընտանիք ամեն օր օգտվում է սննդից, մնացածը Լաթաքիայում իրենց հարազատների տներում են և սպասում են Քեսաբի ազատագրմանը՝ իրենց տները վերադառնալու համար:
«Նրանք գիտեն՝ եթե վերադառնան, իրենց տնտեսությունը չի լինի այնպիսին, ինչպիսին թողել են, իրենց հարստությունը, փողը, ամեն ինչ թալանված կլինի, և խնդրում են աշխարհասփյուռ հայությանը՝ ամեն կերպ աջակցելու վերականգնել իրենց տնտեսությունը»,- ասաց Էդմոն Մարուքյանը՝ հավելելով, որ զինյալներին ալևս ֆինանսավորում չկա, նրանց հիմա ասում են՝ ինչքան թալանեք, ձերն է:
«Ցեղասպանության 100-ամյակին ընդառաջ՝ Թուրքիան ցույց տվեց, որ ոչ մի բան չի փոխվել, որ գաղափարները նույնն են»,- հավելեց նա:
Լուսանկարը` PAN Photo-ի
