«Հրանտ Մաթևոսյան» մշակութային կենտրոն-թանգարանի շինարարությունը սկսվել էր դեռևս 2015թ-ին և պետք է ավարտվեր երկուսուկես տարում, շենքը դեռևս կիսակառույց է: Երևանի քաղաքապետարանը թույլատրել է շենքի երրորդ հարկի կառուցումը:
«Առաջին լրատվական»-ի հետ զրույցում կինոռեժիսոր Դավիթ Մաթևոսյանը նշեց, որ այս կապակցությամբ Մշակույթի փոխնախարար Նարինե Թուխիկյանի հետ հանդիպում են ունեցել Քաղաքաշինության պետական կոմիտեի ղեկավար Նարեկ Սարգսյանի հետ. «Տպավորությունն այնպիսն էր, որ պետության ֆինանսավորման խնդիրը հարցականի տակ է, միայն երրորդ հարկի խնդիրը չէ, ամբողջական հայեցակարգ ենք ներկայացրել, խոսքը մեր՝ ժառանգներիս անձնական ամբիցիաների մասին չէ, այլ հինգ հեղինակների ներկայացրած մասնագիտական հայեցակարգի մասին է: Հայեցակարգն ուղարկվել է նաև վարչապետին, նախագահին, ինչպես նաև ներկայացվել է հետքրքրված անձանց: Միջավայր, Լոռվա բնության մոդելավորում, էքսպոզիցիա, այս ամենը պետք է արվի, ոչ թե տուն-թանգարան պետք է լինի, այլ մշակութային կենտրոն, որը սերունդներ է դաստիարակելու, մշակութային կրթություն է տալու: Այո՛, Հրանտ Մաթևոսյանի կյանքին և գործունեությանն էլ է անդրադառնալու, բայց ավելի լայն գործունեություն է ծավալելու: Մենք խոսում ենք ամբողջկան քաղաքաշինական մշակութային միջավայրի մասին, որը ներառում է քաղաքի այդ հատվածը, շատ գեղեցիկ և գրավիչ բաներ կարող են քաղաքի այդ հատվածը կենդանացնել, ոճի բերել, ինչպես նաև բնապահպանական խնդիրներ լուծել, քանի որ այդ հատվածում նաև ծառեր ենք տնկելու:
«Ցավոք, առայժմ չկամություն տեսա: Այսպես ասած «հանդիպում- հետախուզում» էր: Կա թույլտվությունը, բայց ակնարկում են, որ ֆինանսներ չկան, բայց մենք պետությունից ֆինանսներ չենք ուզում, մենք ասում ենք՝ թո՛ւյլ տվեք շենքը կառուցել, մենք հանգանակություն կկազմակերպենք:
Մենք պետության դուռը եկած մուրացկան չենք: Ժամանակին վարչապետ Անդրանիկ Մարգարյանն է դիմել մեզ, որ հայեցակարգ ներկայացնենք, որպեսզի մշակութային կենտրոն կառուցվի»,- նշեց կինոռեժիսորը՝ հավելելով, որ պետությունը ստանձնել է և 2015թ. սկսել է իրականացնել շինարարությունը. 900 հազար ԱՄՆ դոլար է ներդրվել: Մասնագետների կարծիքով՝ ևս 400 հազար ԱՄՆ դոլար անհրաժեշտ կլինի, և երրորդ հարկի կառուցման համար կպահանջվի 55 մլն դրամ: Դ. Մաթևոսյանի կարծիքով՝ եթե մեկենասների համար դյուրություն ստեղծվի, և նախագիծը առաջնային հռչակվի պետության կողմից, ապա մեկենասներ կգնտվեն:
Մանրամասն՝ տեսանյութում: