Լուրեր
Նախկին իշխանությունները մինչև հիմա «դանոս» են գրում ռուսաց թագավոր Պուտինին
  • 13:00
  • 2019-09-06
  • Դիտումներ՝ *

Հոկտեմբերի սկզբին սպասվում է Ռուսաստանի նախագահ Վլադիմիր Պուտինի այցը Հայաստան, և այս այցի ֆոնին ավելի են սրվել բանավեճերն ու հանրային քննարկումները հայ-ռուսական բարդ հարաբերությունների մասին: Թեմայի շուրջ զրուցելու համար «Առաջին լրատվական»-ը հյուրընկալել է քաղաքագետ Արկադի Վարդանյանին և Գերագույն խորհրդի պատգամավոր Ազատ Արշակյանին:

«Ռուսաստանը ամենևին ուրախ և երջանիկ չէ Հայաստանում անցյալ տարի տեղի ունեցած հեղափոխությամբ և ներդնում է բոլոր ջանքերը, որպեսզի իշխանության վերադառնան իր հին վասալները»,- նշեց Արկադի Վարդանյանը:

Նրա կարծիքով, սակայն, Ռուսաստանի այդ ջանքերը չեն պսակվի հաջողությամբ, քանի որ ինքը՝ Ռուսաստանը, հետզհետե հայտնվում է ինչպես սոցիալ-տնտեսական, այնպես էլ բարոյահոգեբանական շատ խոր անդունդի եզրին. «Մեր հասարակության մեջ ևս օրեցօր մաշվում են Ռուսաստանի՝ մեծ, անպարտելի, մեր միակ հենարանը լինելու մասին պատկերացումները»:

Արկադի Վարդանյանի խոսքով՝ իշխանության հապաղումը, քաղաքական կամքի բացակայությունը իրենց բացասական դերն են կատարում. «Դրանից օգտվում է, այսպես կոչված, 5-րդ շարասյունը՝ քոչարյանականներ, սերժիկականներ, դաշնակներ, բարգավաճողներ և այլն»:

Ազատ Արշակյանն էլ ընդգծեց՝ հեղափոխությունը տեղի է ունեցել. «ԵՏՄ առանձին մի երկրում տեղի ունեցավ ժողովրդավարական հեղափոխություն. ժողովուրդը իշխանությունը վերցրեց իր ձեռքը: ԵՏՄ-ում մեզ բախտակից մյուս երկրների ժողովուրդները նայում են մեզ, և այնտեղ իշխանությունները վախեցած են, որ իրենց մոտ նույնպես կլինի հեղափոխություն, և իշխանությունը կանցնի բելառուս, ռուս, ղազախ, կիրգիզ ժողովուրդներին: Մենք առանձնացել ենք մեր բախտակից գերի ընկերներից»:

Նրա խոսքով՝ ԵՏՄ ընդհանուր իշխանության ղեկավարը Միկոյան 2-րդն է՝ Տիգրան Սարգսյանը. «Դուք պատկերացնո՞ւմ եք՝ իմպերատորը, Չինգիզ խանը հայ է հիմա: Չինգիզ խանը Տիգրան Սարգսյանն է»:

Ազատ Արշակյանը համարում է, որ Ռուսաստանին այսօր մատնագիր գրողները ոչ թե քաղաքական գործիչներ են, այլ վասալներ, որոնք ունեն դավադրության իրենց որջը. «Ուղղակի մետրոպոլիան՝ Ռուսաստանը, ավելի առաջ է գնացել, քան թե իր վասալները: Նա մեզ ճանաչում է որպես գործընկեր՝ վատ օրից, բայց մեր վասալները՝ 5-րդ, 8-րդ, 100-րդ շարասյունը, համաձայն չեն, ասում են՝ չենք ուզում ձեր գործընկերը լինել, ուզում ենք ձեր վասալը լինել, ծառայել ձեզ, ձեր աղախինը լինել, մենք հավասար չենք ձեզ: Հիմա ես ասում եմ՝ մենք շատ հավասար ենք, մենք գործընկեր ենք աշխարհի հետ, մեր երկիրը՝ հատկապես թավշյա հեղափոխությունից հետո, հայտ է ներկայացրել գործընկերության: Մենք պատրաստ ենք գործընկերային հարաբերություններ ունենալ բոլոր երկրների, այդ թվում՝ մեր բախտակից, բանտակից, խցակից ընկերների հետ»:

 

Հարցազրույցն ամբողջությամբ՝ տեսանյութում:

  • Դիտումներ՝ *