Սահմանադրական դատարանի որոշումից հետո Ռոբերտ Քոչարյանի համակիրներն ու պաշտպանները հայտարարում են, որ նա պետք է լինի ազատության մեջ, իսկ Քոչարյանի հակառակորդները՝ որ նա պետք է մնա կալանքի տակ, քանի որ ՍԴ որոշումը ամենևին չի ենթադրում Քոչարյանի կալանքի փոփոխություն: Այդ գնահատականը տվել է նաև արդարադատության նախարարը, նաև գլխավոր դատախազությունը: Միաժամանակ, գործնականում բոլորն էլ արձանագրում են, որ ՍԴ որոշումը ամբողջապես հրապարակված չէ, հետևաբար, ներկայիս գնահատականներն ու մեկնաբանություններն էլ ամբողջական չեն: Ի՞նչ կա այդ որոշման մեջ ամբողջությամբ, պարզ կլինի եռօրյա ժամկետում, որ սահմանված է որոշման ամբողջական հրապարակման համար:
Այստեղ առաջանում է, օրինակ, մի տեսական հարց՝ իսկ արդյոք որոշումը ամբողջապես գրվա՞ծ է եղել նախօրեին, երբ հրապարակվել է դրա մի մասը, թե՞ ըստ այդ մասին հրապարակման ձևավորված հանրային, քաղաքական տրամադրությունների էլ կազմվելու է ամբողջական որոշումն ու արդեն հրապարակվելու է լիովին, դրանից բխող հետագա զարգացումներով: Ուշագրավ է այդ համատեքստում վարչապետի խոսնակ Վլադիմիր Կարապետյանի արձագանքը, որը ասել է, որ գործադիրը ի գիտություն է ընդունել ՍԴ որոշումը և այլ անելիք չունի, որովհետև այդ որոշումը չի առնչվում գործադիրին: Սա, իհարկե, ֆորմալ կողմն է, որովհետև ոչ ֆորմալ, քաղաքական տողատակերում անշուշտ տեղի են ունենում հետաքրքիր զուգահեռ զարգացումներ: Նախօրեին նկատեցինք 2008 թվականի «Գոլդեն Փելես» հյուրանոցային համալիրի հողատարածքի օտարման անօրինականության մասին ՀՔԾ տեղեկատվության տարածումը, որ ՍԴ որոշման հրապարակումից ժամեր առաջ էր:
Այդ իմաստով հարվածի տակ է, իհարկե, նախկին քաղաքապետ Երվանդ Զախարյանը, սակայն կասկածից վեր է, որ Զախարյանն այդպիսի նշանակալի նախագծերի համար հողի օտարման որոշումը չէր կարող կայացնել առանց քաղաքական ղեկավարության հանձնարարության: Իսկ խոշոր հյուրանոցային այդ համալիրը, ինչպես հետո հաստատվեց մամուլի հրապարակումներով, գործնականում հայաստանյան այդ շրջանի քաղաքական ղեկավարությանն առնչվող նախագիծ էր: Ըստ այդմ հարց է առաջանում՝ կարո՞ղ է Երվանդ Զախարյանը տալ որևէ քաղաքական անուն՝ ասելով, որ կատարել է հրաման: Ինչպես, օրինակ, ասում են մարտի 1-ին 0038 հրամանի և դրանից բխող գործողությունների մասնակից զինվորականները: Բայց, մյուս կողմից, դեռ պետք է ապացուցել, որ եղել է անօրինական հողօտարման հանձնարարություն քաղաքական ղեկավարությունից, ինչպես դեռևս պետք է ապացուցել, որ մարտի 1-ին բանակը Ռոբերտ Քոչարյանի հրամանով՝ բացի Երևան գալուց, նաև մասնակցել է գործողությունների և կրակել ցուցարարների վրա: Ի դեպ, այդ իմաստով հատկանշական է, որ մարտիմեկյան գործին զուգահեռ, ու նաև ՍԴ-ում այդ գործի վերաբերյալ Ռոբերտ Քոչարյանի առնչությամբ հարցի որոշման հրապարակմանը զուգահեռ, նկատվում է այլ գործերով օղակի ձևավորում: Խոսքն այն մասին է, որ ՍԴ որոշման հրապարակմանը զուգահեռ տարածվեց մեկ այլ տեղեկատվություն, այս անգամ 2001 թվականին Առագաստ սրճարանում Պողոս Պողոսյանի սպանության գործին առնչվող, որի համար պայմանական ազատազրկման դատապարտվեց Ռոբերտ Քոչարյանի թիկնապահներից մեկը: Երևանում է բրիտանացին, որն այդ դեպքին եղել էր ականատես, սակայն որը հեռացել էր Հայաստանից և որի գրավոր ցուցմունքը դատարանն անտեսել էր: Այժմ բրիտանացին՝ Նյուտոն խորհրդանշական ազգանունով, Հայաստանում է և հայտնում է ցուցմունքը կրկնելու պատրաստակամություն: Նկատելի է, որ ՍԴ որոշմանը զուգահեռ, Ռոբերտ Քոչարյանի շուրջ սեղմվում է «հարակից» գործերի մի օղակ, ինչը առաջացնում է հարց, մասնավորապես այն առումով, թե արդյո՞ք մարտիմեկյան գործը չի ունեցել բավարար արդյունավետություն: Թե՞ իշխանությունը դատական համակարգի վրա անմիջական ազդեցության մարտավարությունից փորձում է անցնել հարակից ճնշումը ավելացնելու մարտավարության, Եվրոպայի խորհրդի հետ անհարկի խնդիրներ չունենալու նկատառումով:
Լուսանկարը՝ Armeniasputnik-ի
