Մեղադրյալ Ռոբերտ Քոչարյանի դիմումի քննության արդյունքում Սահմանադրական դատարանի կայացրած որոշման թեման քննարկելու համար «Առաջին լրատվական»-ը հյուրընկալել է ՀԱԿ իրավական հանձնաժողովի ներկայացուցիչ Արմեն Խաչատրյանին և նախկին քաղբանտարկյալ Հովհաննես Հարությունյանին:
Արմեն Խաչատրյանը կարծում է, որ ՍԴ-ն իր այս որոշմամբ ավելի խճճեց իրավիճակը և չէր էլ կարողանալու լուծել Ռոբերտ Քոչարյանի ազատ արձակման հարցը. «Նախ՝ ովքե՞ր են Հրայր Թովմասյանը և մյուսները. նրանց լիազորությունները 2018թ. ապրիլից արդեն դադարել են: Սրանք մարդիկ են, ովքեր այս պահին զավթել են Սահմանադրական դատարանը և փորձում են ապօրինի կերպով իրացնել այդ լիազորությունները»:
Նրա խոսքով՝ խիստ վիճահարույց է Հրայր Թովմասյանի՝ ՍԴ անդամ և ապա նախագահ դառնալու այդ գործընթացի օրինականությունը. «Իմ խորին համոզմամբ՝ քրեական վարույթ իրականացնող մարմինները անելիք ունեն նաև այս մասով. անհրաժեշտ է, որ ուսումնասիրեն, թե ինչպես է ԱԺ պատգամավորը ֆեյք-օպերացիայի արդյունքում դարձել Սահմանադրական դատարանի նախ՝ անդամ, ապա նախագահ: Այնպես որ՝ այս մարդիկ ՍԴ որոշում կայացնելու իրավասություն չունեին: Ինձ ուրախացրեց այն փաստը, որ «քննությանը» մասնակցած ՍԴ միակ դատավորը հանդես է եկել հատուկ կարծիքով»:
Հովհաննես Հարությունյանն էլ անխուսափելի է համարում այն, որ Ռոբերտ Քոչարյանը ցմահ դատապարտվելու է. «Ռոբերտ Քոչարյանը մանևրելու տեղ չունի. 0038 հրամանը տվել է, որի արդյունքում էլ ունենք 10 զոհ»:
Արմեն Խաչատրյանը հավելեց, որ այժմ կա միայն ՍԴ վճռի եզրափակիչ մասը. «Այս եզրափակիչ մասը այնքան վատ է գրված, որ որևէ բան չես հասկանում: Եթե 35-րդ հոդվածն են համարել հակասող և անվավեր, ապա դա կոլապս է»:
Հարցազրույցն ամբողջությամբ՝ տեսանյութում: