Կիպրոսի նախագահ Նիկոս Անաստասիադիսը կիպրոսցի թուրքերին լուծում է առաջարկել Կիպրոսի բացառիկ տնտեսական գոտում ածխաջրածնային պաշարները շահագործելու խնդրին. բացել էսքրոու հաշիվ՝ կիպրոսցի թուրքերին բնական գազի վաճառքից մասնաբաժին փոխանցելու համար, հաղորդում է կիպրական «Կատիմերինի» պարբերականը:
Պարբերականի տվյալներով, Անաստասիադիսը կոնկրետ առաջարկ է արել օգոստոսի 9-ին թուրքական համայնքի ղեկավար Մուստաֆա Աքընջիի հետ հանդիպման ժամանակ, որից հետո այն ներկայացվել է գրավոր տեսքով:
«Առաջարկը, որն ամբողջությամբ հաշվի է առնում թուրքական կողմի արտահայտած ցանկացած մտահոգություն ածխաջրածնային եկամուտների մասնաբաժնի մասով, ներկայացվել է կիպրոսցի թուրքերի առաջնորդ Մուստաֆա Աքընջիի դիտարկմանը»,- գրում է պարբերականը:
Անաստասիադիսը ձգտում է վերացնել թուրքական կողմի ցանկացած պատրվակ, որը խանգարում է Կիպրոսի կարգավորման շուրջ երկխոսության վերսկսմանը:
էսքրոու հաշվի շահառուն կդառնա Կիպրոսի թուրքական համայնքը և կկարողանա տնօրինել միջոցները, եթե բավարարվի պայմանը. Թուրքիան դադարեցնի սադրանքները տարածաշրջանում՝ ճանաչելով Կիպրոսի ԲՏԳ սահմանները:
«Թուրք ղեկավարի առաջին արձագանքը դրական է թվում, բայց նախագահի առաջարկի ճակատագիրը կորոշվի Անկարայում»,- ասվում է հոդվածում:
