Իտալիայի նախկին վարչապետ Ջուզեպե Կոնտեն համաձայնել է ղեկավարել նոր կառավարությունն այն բանից հետո, երբ նրա նախկին գործընկերները՝ «Լիգան» իր ռուսամետ առաջնորդ Մատեո Սալվինիի հետ կազմալուծեցին նախորդը:
Օգոստոսի 4-ին Կոնտեն ընդունեց նախարարների խորհրդի նախագահի մանդատը՝ ներկայացնելով կառավարության իր կազմը:
Նա արտաքին գործերի նախարարությունը վստահել է նախկին փոխվարչապետ և «Հինգ աստղ» շարժման առաջնորդ Լուիջի Դի Մայոյին, որը նախորդ կառավարության կազմում աշխատանքի և տնտեսական զարգացման նախարարն էր:
Սալվինիի փոխարեն ներքին գործերի նախարար է նշանակվել «տեխնիկական» մասնագետ Լուչանա Լամորջեզեն:
Կոալիցիայի կրտսեր գործընկեր ձախակենտրոն Դեմոկրատական կուսակցության անդամ Ռոբերտո Գուալտիերին, որն այժմ ղեկավարում է Եվրոպառլամենտի տնտեսական և արժութային հարցերի հանձնաժողովը, դարձել է էկոնոմիկայի և ֆինանսների նախարար:
«Շարժումից» Ալֆոնսո Բոնաֆեդը պահպանել է Արդարադատության նախարարության ղեկավարի պորտֆելը:
Անցած ամիս Ջուզեպե Կոնտեն հայտարարեց իր հրաժարականի մասին՝ դրանում մեղադրելով Մատեո Սալվինիին, որն, ըստ նրա, իր անձնական և կուսակցական շահերը վեր դասեց պետական շահերից:
Ավելի ուշ, Իտալիայի նախագահ Սերջո Մատարելան Ջուզեպե Կոնտեին վստահեց նոր նախարարների կաբինետի ձևավորման գործընթացը՝ դեմոկրատների հետ: