Հատուկ քննչական ծառայությունը տեղեկություն է տարածել քրգործի մասին, որը վերաբերում է Երևանում «Գոլդեն Փելես» հյուրանոցային համալիրի տարածքի հատկացմանը: Ըստ ՀՔԾ հաղորդագրության՝ Երևանի նախկին քաղաքապետը 2008 թվականին կայացրել է տարածքի հատկացման անօրինական որոշումներ՝ վնաս պատճառելով Երևան քաղաքին: Խոսքը փաստորեն Երվանդ Զախարյանի մասին է, որը Երևանի քաղաքապետի պաշտոնն էր զբաղեցնում այդ ժամանակ, և որը հետագայում զբաղեցրել է նախարարական մի շարք պաշտոններ, այդ թվում՝ կապի ու տրանսպորտի նախարարի, էներգետիկայի նախարարի պաշտոնները:
«Գոլդեն Փելես» հյուրանոցային համալիրը, ինչպես հայտնի է, վերագրվում էր մաքսային կոմիտեի նախկին պետ Արմեն Ավետիսյանին, որը համանուն հյուրանոցային համալիր կառուցեց նաև Ծաղկաձորում: Ի դեպ, հենց ծաղկաձորյան համալիրն է, որ Ավետիսյանը նվիրաբերում է պետությանը, այսպես ասած՝ որպես պատասխանատվությունից ազատման տարբերակ, քանի որ կար նաև այդ առնչությամբ ծավալված գործ:
Ներկայումս Երևանի «Գոլդեն Փելես» համալիրը արդեն որոշակի ժամանակ այլ ապրանքանիշի ներքո է՝ այն գործում է «Ռեդիսոն Բլյու» հյուրանոցային համաշխարհային ցանցի ներքո: Միևնույն ժամանակ, հյուրանոցի բացման պատմությունը աչքի ընկավ մի հիշարժան դրվագով: Հյուրանոցը բացվեց Ռոբերտ Քոչարյանի նախագահական շրջանում, և բացման արարողությանը Քոչարյանը հայտարարեց, թե հյուրանոցը արտասահմանյան ներդրում է, ինքը ստուգել է դա և ասում է համոզված: Ներդրողը Կիպրոսի օֆշորում գրանցված ընկերություն էր, ու թեև նախագահ Քոչարյանը ի լուր ամենքի հավաստիացնում էր, որ գործ ունենք օտարերկրյա ներդրման հետ, մի քանի օր անց պարզվեց, որ ներդրումը հայկական է: Մամուլում այդ մասին խոստովանել էր այդ շրջանում էկոնոմիկայի նախարար Կարեն Ճշմարիտյանի եղբայրը՝ կապի ու տրանսպորտի փոխնախարար Հայկ Ճշմարիտյանը, որն «Ազգ» օրաթերթի հետ զրույցում էր ասել, որ ինքն է ներդրողը:
Իհարկե, թերևս այդ ժամանակ էլ պարզ էր, որ պաշտոնյան ավելի շուտ «քող» է իրական ներդրողի համար, ոչ թե ներդրող: Սակայն անհարմար վիճակում հայտնվեց Ռոբերտ Քոչարյանը, որը փաստորեն հավաստիացրել էր, որ ներդրումն օտարերկրյա է:
Ի դեպ, դա հետաքրքիր դրվագ է, թե ինչպե՞ս ստացվեց, որ Քոչարյանը հայտնվեց այդ անհարմար իրավիճակում, ինչպե՞ս դուրս լողաց տեղեկատվությունը, այն էլ՝ նախագահի հայտարարությունից հետո: Դա, իհարկե, առանձին թեմա է: Սակայն հետաքրքիր է նաև, որ ՀՔԾ տեղեկատվությունն էլ՝ այդ «աղմկահարույց» հյուրանոցային ներդրման հիմքում եղած անօրինական որոշումների մասին, հրապարակում է հայտնվում Ռոբերտ Քոչարյանի գործի վերաբերյալ ՍԴ որոշմանն ընդառաջ: