Այսօր Սահմանադրական դատարանը հրապարակելու է մեղադրյալ Ռոբերտ Քոչարյանի պաշտպանների դիմումի պատասխանը: ՍԴ որոշումից է կախված Ռոբերտ Քոչարյանի խափանման միջոցը: Եթե ՍԴ-ն որոշի, որ կա խնդիր, ապա Ռոբերտ Քոչարյանը սեպտեմբերի 12-ին մեկնարկելիք իր գործով դատավարությունը կդիմավորի ազատության մեջ: Այս գործի ամենամեծ ինտրիգը հետևյալն է՝ Ռոբերտ Քոչարյանը կլինի ազատությա՞ն մեջ, թե՞ որպես կալանավոր: Թեման քննարկելու համար «Առաջին լրատվական»-ը հյուրընկալել է քաղտեխնոլոգ Վիգեն Հակոբյանին և քաղաքագետ Սուրեն Պետրոսյանին:
Վիգեն Հակոբյանը կարծում է, որ երկրում կուտակվել են մի շարք խնդիրներ (Ամուլսարի խնդիր, Ստամբուլյան կոնվենցիա և այլն), որոնք կարող են «թեժ աշնան» պատճառ լինել. «Ռոբերտ Քոչարյանի շուրջ ՍԴ-ում ստեղծված իրավիճակը նույնպես թեժացման կետերից մեկն է»:
«Ես կարծում եմ, որ մենք մոտ 30 տարի է՝ «թեժ աշնան» մեջ ենք, որովհետև իրականում չենք ունեցել էվոլյուցիոն զարգացում, չենք ունեցել Ա-ից Բ կետ անցման ճանապարհը, որը կբխեր հանրային շահից և պետության արդիականացման մեր տեսլականից: Հետևաբար երբ մենք չունենք պետական, ազգային օրակարգ, մեզ համար ցանկացած խնդիր կարող է դառնալ օրակարգ և բոլորիս համար՝ դիսկուրս»,- նկատեց Սուրեն Պետրոսյանը:
Քաղաքագետը տարակուսում է՝ ինչո՞ւ է ամբողջ դիսկուրսը ծավալվում երկրորդ նախագահի շուրջը. «Չէ՞ որ մենք ունենք պետության առջև ծառացած բազմաթիվ մարտահրավերներ, ընդ որում՝ այդ մարտահրավերներից ոմանցից կախված է նաև մեր լինելիության խնդիրը: Եվ մենք որևէ դիսկուրս չենք ծավալում այդ հարցով, այլ ծավալում ենք երկրորդ նախագահի հարցով»:
Նրա խոսքով՝ արդյոք որևէ բան փոխվելո՞ւ է մեր օրակարգում, եթե երկրորդ նախագահը հայտնվի ազատության մեջ կամ դատապարտվի. «Մի՞թե մեր ամբողջ պետականության խնդիրը երկրորդ նախագահի դատվել կամ չդատվելն է: Ես կարծում եմ՝ արդարադատությունը կետային տարբերակով չի վերականգնվում. արդարադատությունը կա՛մ լինում է համակարգային, կա՛մ ընդհանրապես չի լինում»:
Ինչ վերաբերում է ՌԴ նախագահին, Սուրեն Պետրոսյանն ասաց. «Մենք մոռանում ենք ընդհանրապես, որ անկախ անձից՝ մենք գործ ունենք նախագահի ինստիտուտի հետ: Պետք է հարգանք ունենանք այդ ինստիտուտի նկատմամբ և ամեն ինչ չբերենք կենցաղային մակարդակի: Սա հանրային կյանքի կազմակերպման և կառավարման կարևորագույն բաղադրիչներից մեկն է: Հետևաբար ես այստեղ որևէ արտառոց բան չեմ տեսնում»:
Հարցազրույցն ամբողջությամբ՝ տեսանյութում:
