«Առաջին լրատվական»-ի զրուցակիցն է «Ժողովրդավարական հայրենիք» կուսակցության նախագահ Պետրոս Մակեյանը։
-Պարոն Մակեյան, հետևելով Ռոբերտ Քոչարյանի անձեռնմխելիության հետ կապված Սահմանադրական դատարանում տեղի ունեցող գործընթացներին՝ ի՞նչ ակնկալիքներ ունեք, արդյոք նախկին համակարգին սպասարկող դատարանը կկարողանա՞ արդար որոշում կայացնել։
-Հարցը բազմաշերտ է միանշանակ պատասխան տալու համար։ Կա երկու գործոն՝ առաջինը իրենք նախկին ռեժիմի հանցակից են, համապետական բոլոր ընտրությունները, այդ կեղծ թվանկարչությունը վավերացվել է Սահմանադրական դատարանում, իրենք հանցակից են հենց Քոչարյանի հետ։ Այսինքն՝ կամ աջակցում են իրենց հանցակցին, կամ վախենում են, որ նոր իշխանությունները՝ Ազգային անվտանգությունը, ոստիկանությունն ու դատախազությունը իրենցով կզբաղվի։ Ինձ զարմացնում է, որ նոր իշխանությունը փորձում է օրենքի նախագիծ ընդունել՝ առաջարկել թոշակ, աշխատավարձ, որպեսզի նրանք կամավոր թողնեն ՍԴ անդամությունը, դա աբսուրդի ոլորտից է։ Ինչ վերաբերում է ՍԴ-ին, ապա եթե գնան այնպիսի ռիսկի ու իրենց կնքահորը պաշտպանեն, այստեղ ասելիք ունի ժողովուրդը, որովհետև իշխանությունները կամաց-կամաց սկսում են անհասկանալի քայլեր անել։
-Այսինքն՝ փողո՞ց պետք է դուրս գա ժողովուրդը։
-Կարծում եմ՝ այլ ընտրանք չկա։ Ես մասնավոր օրինակ բերեցի, բայց ինձ մոտ տպավորություն է, որ իշխանությունը կաշկանդված է կտրուկ քայլեր իրականացնելու հարցում։ Ուստի, կտրուկ քայլեր իրականացնելու անհրաժեշտությունը ժողովրդինն է։
-Ժողովո՞ւրդն արդարադատություն իրականացնի։
-Կոնկրետ այս փուլում, կարծում եմ, արդարադատություն իրականացնելու նախապատվությունը պետք է տրվի ժողովրդին։ Իշխանության նախաձեռնած բարեփոխումներն անհասկանալի են՝ վեթինգ էին անում, հրաժարվեցին։ Հետո անցումային արդարադատությունն իր հայտ եկավ, բայց մնաց անորոշության մեջ։ Քոչարյանի ու Սերժ Սարգսյանի մեջ պետք է հավասարության նշան դրվի, ու եթե իրենց հանցակիցներն իրենց պաշտպանեն, ժողովուրդն էլ իր ասելիքը պետք է ունենա։
-Իսկ եթե Քոչարյանը հայտնվի ազատության մեջ, ի՞նչ վտանգ կարող է ներկայացնել։
-Կարծում եմ՝ Քոչարյանի գործոնը, որպես քաղաքական գործոն, մեծ չէ։ Նա այսօր համատարած ատելության սիմվոլ է, Սերժ Սարգսյանին հավասար, մի քիչ էլ ավելի։ Եթե Սերժին մերժեցին, նրան պետք է մերժեն ու մերժեն։ Բայց հաշվի առնելով, որ նա ներկայացնում է հինգերորդ շարասյունը ու Ռուսաստանի ուշադրության կենտրոնում է՝ պետք է զգոն լինեն։ Մի մոռացեք, որ ՀՀԿ-ն ԱԺ ընտրություններին մոտ հինգ տոկոս ձայն հավաքեց, այդ բոլորը իրենց համար ռեսուրս են։ Ես միշտ ասել եմ՝ նա կարող է անկայունություն ստեղծել, բայց իշխանություն վերցնելու համար հնարավորություն չունի, որովհետև Հայաստանում փոխվել է նաև ժողովուրդը։
